La semana pasada no pude eskrivir mi artikolo porke estava en Israel kon el Mayor de Edirne i un grupo de 18 personas, la mas grande partida miembros del Konsilyo de la Munisipalidad. I sinko diyas reelmente me kansi kada diya kaminando mas de 10 o 12.000 pasos. I torni kon la Corona. Vos va kontar esto todo en el Amaneser.
Unos kuantos mezes antes, dos o tres amigos me telefonaron porke el Doktor Sevi de Israel va kitar un livro: “De Balat a Ashkelon” en turko i lo kere afirmar en la guerta de la Sinagoga de Ahrida. No so yo el ke se okupa de la Sinagoga de Ahrida. A la fin les dishe SI. Kualo kaliya azer: Avlar kon el Sinyor Soryano ke es el prezidente de esta fondasion i tomar su permision; avlar kon la seguridad para dar karar komo devemos de azerlo; kale ofreser una bevyenda i dar un biskocho o una boreka; kale ke en este diya una persona sea responsavle para arekojer las paras de los livros i dar una resivida… No es muy kolay. Diya de myerkoles eskrivi un whatsapp al editor del livro i me disho ke no estavan dainda prontos los livros. Dia de vyernes me disho ke keria deshar 250 livros. Le dishe no mos agas hamallık. No es posivle ke en un diya vendamos mas de 100 livros. I los desho. Oy no puediya salir a la kaye. Ay dos diyas ke demandi a muestro amigo Doğan Pinhas de ser el patron de este diya. I yami a mi sovrina Idil i le demandi si puediya ir 4 o 5 oras a Balat i me respondyo SI.
De la demanyana empesaron a telefonar al muzeo para demandar si la Sinagoga esta avierta o no? Si, dishimos si; mas munchas personas se fueron asta Balat para ver la Sinagoga i para merkar el livro. Kero felisitar el Dr. Sevi i el editor Oğuz Akçeşme. I siguro a Doğan Pinhas.
Oy teniamos en el muzeo un filmo sovre el Sinyor Moris Gabbay. Un ombre ke bivyo toda la Republika en muestro payis. I despues aviamos organizado un interview kon el sinyor. Elda Sason era la moderatora. I yo lo puediya azer. Los dos, estando Coroneados no pudimos realizar esta aktivitad.
Diya de myerkoles, el sinyor Selim Bonfil, el Izmirli va estar en Estanbol i vamos a prezentar su livro sovre Izmir ke reelmente es el fruto de un lavoro muy emportante i muy largo. Devemos de rengrasyar el sinyor Bonfil, porke muy poka djente tyene el koraje de meter en vida un livro asemejante. Ya se ke Gila Erbeş, la editora de los livros del Şalom izo munchos esforsos para ke este proyekto sea realizado. La kero rengrasyar. Selim va sinyar sus livros en el Muzeo Djudio (al lado del Neve Şalom) entre las oras 15.30 i 18.30. En el mizmo tyempo tenemos una ekspozisyon de fotografias istorikas sovre los Djudios de Izmir.
Para eskapar las aktivitades vos kero avlar del filmo sovre la Muzika Sefaradi ke va tomar lugar en la Sinagoga de Neve Şalom a las 15.00 diya de Alhad el 10 de Avril. Vos asperamos.
