En la medya noche del 15 Nisan, mando a dizir Paro a todo el puevlo Djudyo ke se topavan en la tyerra de Goshen ke eyos eran liberos i ke puedian salir de su paiz. I al punto, los Djudyos ke ya estavan prontos esperando esta ora, se rekojeron, todos kon prisa en el kartier Ramses. I a la manyana en el kinze Nisan, salyeron todos los Djudyos de el Ejipto kon grande koraje i alegriya despues de aver estado sudjeftos en este paiz 210 anyos.
La suma del puevlo ke salyeron de el Ejipto era 600 mil almas de ombres de 20 anyos para ariva fin a 60 anyos en desparte de mansevos manko de 20 i vyejos mas de 60 anyos i de mujeres i kreaturas. I akel diya salyeron tanbien muncha djente de otros puevlos ke estavan en el Ejipto i se adjuntaron kon los Djudyos.
El puevlo Ejipsyano, konosyendo a los kavos la grande endjustisya ke kometyeron kon los Djudyos en lugar ke tantas buendades ke vyeron de el, i vyendo ke ay Dyo en los syelos ke paga a kada uno sigun su ovra, kijeron afalagarsen un poko kon eyos. I les fueron regalandoles muncha plata i oro i piedras presyozas, munchas kozas valutozas. I les aziyan demandar todo lo ke teniyan menester para darles en tal de afalagarlos. I ansi salyeron los Djudyos de Mistrayim, kon muncha rikeza sigun se lo prometyo El Todo Poderozo a Avraam kuando le avizo lo ke teniya de arivar a sus ijos.
Salyendo del Ejipto, no se olvido Moshe Rabenu de tomar kon el el sirkelyo de Yosef, sigun lo enkomendo antes de su muerte. Los grandes del puevlo tambien tomaron kada uno el sirkelyo de los 11 ermanos de Yosef, los Kapos de los Shevatim i se los yevaron kon eyos.
