La semana pasada eskrivi mi dos artikolos por el Şalom i por el Amaneser kuando estava en kaza kon mi Corona. Grasias al Dyo ke fue muy livyano. Antes de felisitarvos por la fyesta de Pesah vos kero kontar sovre unas kuantas aktividades del Muzeo Djudio. Esta noche, noche de lunes teniyamos una reunyon de la komunidad. I aya me dyeron la palavra para ke konte los evenimyentos ke estamos azyendo en muestro muzeo.
Estas semanas dalkavo estamos viendo ke la djente, sean miembros de muestra komunidad o no, estan preferando vijitar lugares istorikos ke no vijitaron komo la Sinagoga de Ahrida o keren ver kozas muevas komo el filmo sovre la muzika Sefardi de la Komunidad Djudia d’Estanbol. Ken pensava ke mas de 150 personas van a vinir un diya de alhad kuando estava mas de 23 grados afuera. I avia personas ke estavan vijitando el muzeo. Diya de myerkoles teniyamos la prezentasion de un livro sovre los Djudios de İzmir ke es un livro muy emportante de Sarit i Selim Bonfil. I kon este evenimyento avia una ekspozisyon sovre los Djudios Izmirlis de Karataş kon las fotografias del famozo “Foto Gagin”. Ken era este sinyor? El Sinyor Aleksandro (Israel Bohor) Gagin, nasido en Manisa en el 1883 vino a İzmir kon sus parientes i kon sus ermanos. Aleksandro fue el uniko ke reusho a avrir un studio de fotrografias en Karataş-İzmir. I munchos anyos fue el uniko fotografo. Su ijo Sami fue el primer ke lavoro en primero en Fransia i despues se fue al lado de su tiyo Vitali a Buenos Aires. Es en 1951 ke el sinyor Aleksandro i su mujer, Ester deshando la botika a sus ijo Rafael se fueron a Buenos Aires. Rafael despues ke se kazo kon Viktorya Kohen, lavoro tres anyos en este studio i el se fue a Buenos Aires transferando su botika al Sinyor Gerşon Musafir.
Reelmente un sujeto muy enteresante para los Djudios İzmirlis i para los Djudios Turkos. Espero ke vamos a reushir a embiyar esta ekspozisyon de fotografias a İsrael antes ke los Izmirlis fiesten el diya de los Izmirlis. Kreo ke todos en İsrael estan fiestando sus diyas. Solo son los Estanbollis ke no lo fiestan.
Yo reelmente kero felisitar los Bonfil (Sarit i Selim) por el lavoro ke realizaron. Pekado ke el livro fue publikado solo en turko i no en inglez o en fransez.
Vos kero dizir otra koza antes de dar fin a mi artikoılo. Vamos a realizar la entevista kon el Sinyor Moris Gabbay ke es un ombre ke tyene mas de syen anyos. Un filmo fue echo sovre su vida. En un a semana vamos a dar karar sovre la data de esta entrevista.
Kero terminar mi artikolo augurandovos un Pesah alegre. No vos olvidesh. Kero dainda todo modo de Agadas para ke sean ekspozadas. Si no es este anyo, va ser para el anyo ke vyene…
