Avram Mizrahi
Se dize por Rambam, Rabbi Moshe ben Maymon, ke "de Moshe a Moshe no salyo otro komo Moshe”, en pensando a Moshe Rabbenu. Ansi ke el Rambam fue una figura ekstraordinarya kon la sensya en sus livros de relijyon i filozofiya, kon su konosensiya en la medisina i en siendo un lider en las komunidades djudiyas desparesidos en el mundo entero.
Era konosido en las komunidades djudiyas malgrado las distansas grandes i el tiempo, Edad Medieval, kuando una letra toma mezes para arivar al destino.
Resiviya letras de munchas personas, rabinos lo mas de diferentes partes del mundo i eskriviya responsas.
Una famoza responsa ansi es la Iggeret Teyman (eskrita en ebreo), la Letra de Yemen.
En el anyo 1168, la komunita djudiya en Yemen enkontra una sekana, un imam fanatiko los ovliga kon fuersa a los djudios en Yemen a ke se abolten a la relijion Islamika.
Un savyo emportante de esta kehila, Rabbi Yaakov el Fayumi se adresa a el Rambam por konsejo, la letra se enbiya de Aden en Yemen a Cairo, en Ejipto ande bive Rambam.
Rambam en su letra los konsola en dizyendo ke esto fue siempre lo ke afito a los djudiyos, las otras relijyones miraron de efasar la relijion djudiya en munchas maneras para provar ke sus relijiones son las verdaderas.
Rambam los konsejo de tener la fe i el diya va vinir ke va eskapar el Egzilo kon el ayudo del Dio.
La letra reusho su proposa, su misyon i los djudiyos de Yemen kedaron fidel a la fe. Rambam siendo totalmente una persona del mundo no se kontento solo kon la letra, se adreso a el Sultan en Ejipto, Saladin I, kon este adreso, la persekusyon de los djudios se termino.
La komunita de Teyman de este tiempo en respekto i gratitud adjustan a la tefila de Kaddish un uzo ke kontinua fina agora las palavras "ke en muestro tiempo i en el tiempo de rabbi Moshe ben Maymon mos va arivar la Geula”.
Estos diyas fiyestamos Purim i se puede dizir ke esta letra es komo lo ke paso en Iran en el tiempo i aki Rambam komo Ester salva los djudios.
Disho Rambam en su libro filozofiko monumental El Gid Para Los Mareyodos
"Ay kozas ke estan a la alkansa,kapasita de la entendamiyento del meyodo de la persona.Ay kozas ke el meyodo no puede entendern de ninguna manera i manera,las puertas de saver son serradas a el."
