La Ajansia "İstanbul 2010 Avrupa Kültür Başkenti" prezento la reputada koreografa Pina Bausch.
Inspirada de la luzya sivdad de ESTAMBOL, metio en shena “NEFES" (soplo), una reprezentasion teatral kon bayles.
Tuvo grande sukseso, las palmas de los espektadores no se aretaron durante las 3 noches de 22- 23- 24 de Julio, 2010, en la shena Muhsin Ertuğrul en Harbiye, Estambol.
Los Estambollis amorozos de arte no se olvidaron de la primera reprezentasion yamada "Mazurca Fogo" prezentada en muestra sivdad antes 7 anyos. Pina Bausch lo avia kreado para la seria "Las sivdades i las personas" i avia prezentado artistikamente la sivdad de Lizbon.
En 2003, durante 3 semanas, Bausch, kon su ekipo de 30 personas, se prepararon vijitando Estambol i sus kuartieres Haliç, Moda, Kasımpaşa, Fatih, las Islas de Marmara, ets. i sus abitantes tambien.
Kon su umor; “NEFES" mos izo sonriir i mos tresalio kon sus performansas perfektas para prezentar i deskrivir la antigua i maraviyoza Estambol.
PINA BAUSCH AVLA KON LAS PERSONAS EN BAYLANDO
Phillipine Bausch vino al mundo en 1940 en Solingen. Mas despues, en Wuppertal serka de Solingen, utilizo el pseudonimo "Pina" i fue onorada
mundialmente kon su Tanztheater (Teatro de Bayle).
Sus parientes, kon el ayudo de sus ermanos i eya mismo, dirijavan el restorante de un otel en Solingen.
Aya se ambezo a observar las personas, el instinkto ke los pusha a las konduktas fundamentalas.
La atmosfera del primer periodo de su vida, konsernando su chikez kon muzika i famiya, se paso unida i oroza. Portanto, la Gerra de 1939 tuvo sus konsekuensas i preparo la kualita de sus ovras reputadas.
Pina supo inspirar kon amistad i krear una vez alegria, una vez tristesa, ma munchas vezes lo komiko o absurdo.
La relasion de la esperansa i la realita es la yave de sus performansas proprias a si…
Kon la beka ke obtuvo de su pais, fue resivida en New York por George Balanchine i realizo ke el bayle klasiko se estava renovando.
Baylo kon los artistos reputados en la Opera Metropolitan.
Entre tantos premios resividos de diferentes paizes, puedemos sitar:
Commandeur de l'Ordre des Arts et des Lettres, 1991.
Chevalier de la Légion d'Honneur, 2003.
Me izo pena ke este anyo en el spektakolo de la noche del 22 de Junio, Bausch no estava mas en la shena kon su grupo. Su vida topo fin el 30 de Junio, 2009.
Pina Bausch se nombrara por ser una de las mas reputadas koreografas i bayladeras del siglo XX, kreando la fuzion (ke fue muncho imitada) del teatro radikal, el arte surrealisto, el drama seksual i el lenguaje del puerpo baylando.
Para Pina Bausch, todas las muzikas tienen la mizma valor, tanto ke ekspresan sensasiones verdaderas.
HAG PESAH SAMEAH!
