En meldando la istorya djudiya vemos ke munchos ombres famozos desharon sus nombres inolvidavles, komo Theodor Herzl, David Benguryon, Moses Mendelson ets. Por siguro ke ay i mujeres muy presyozas komo Golda Meir, Hanna Rovina, Donna Gracia... eyas i munchas. Ma ay otras mujeres djudiyas ke estan en sigundo plano, ke no se konosen tanto ma ke eran presyozas en la istorya mundial, i desharon sus valutozas palavras. Unas kuantas de eyas....
JUDITH LEIBER (1921-2018)
“La reyna de las chantas”. Nasyo en Budapest 192 en la sigunda gerra mundial, su famiya fue ovligada de kuzir uniformas de soldados ma eya prefero azer chantas i empeso a venderlas a los soldados Amerikanos. Fue muy reushida, de sorte ke empeso a azerles chantas a las artistas de sinema komo Greta Garbo, Elizabeth Taylor. Entro en munchas koleksyones de arte. Kazada kon Gerson Leiber, muryo a los noventa anyos de una kriza de korason.
Su palavra de alkavo fue: grasyas a Hitler, achakes de el me ambezi a azer chantas.
HEDY LAMARR (1914-2000)
Hedy Lamarr era una emigrante i una estreya de Hollywood. Eya era la mas ermoza i tambyen la mas seksi. Aparte de su karyera de sinema, era eksperimentada en muevas teknolojiyas i eventos. Lo mas importante, lavoro enriva GPS i WİFİ. Ma syempre fue konosida komo artista ermoza i seksual.
Su palavra de alkavo: las analises ke ize me dyeron libertad; me sinti ke estava bivyendo en otro siglo.
FRANCESKA MANN (1917-1943)
Franceska era una balerina ke muryo en Auschwitz a la edad de 26 anyos. Eya se konose komo la balerina ke mato a los nazis. Eya mato a un ofisyal de la SS antes de entrar a la kamareta de gaz.
Su palavra de alkavo: malorozamente nada no keda en el mundo.
EMMA GOLDMAN (1869-1940)
Sigun el arshivo de mujeres djudiyas, en el siglo XX Emma fue una anarshista aktiva en la politika Amerikana. Syempre defendyo la libertad de avlar, la libertad sexual, la independensya de las mujeres, la edukasyon radikal, la djustisya i los derechos de los lavorantes.
Sus palavras de alkavo: el trokamyento de ideas no se realiza sin revolusyon. La revolusyon es la aksyon del pensamyento libre.
EMMA LÁZARO (1849-1887)
Emma Lazarus fue eskritora i poeta. Eya es el otor del poema ‘The New Colossus’ (la manyifika estatua de Apolo en Rodes, una de las syete maraviyas del mundo) eskrito en la Statua de la Libertad. Syempre dezeo ke los emigrantes tengan una vida mijor. En su poema dize,
Dame a mi a los dezmazalados
Ke estan afritos de respirar
En esta tyerra no ay lugar
Para los miseravles...
Su palavra de alkavo: todo esta klaro komo el diya, no es ansi?
MARIANNE COHN (1922-1944)
Marianne en la sigunda gerra mondial, estava salvando a las kriaturas del governo fransez de VICHI ke estava okupado por los nazis. La aferraron, la echaron en prezo ma eya de la prizyon mezmo kontinuo a salvar kriaturas. Eya fue torturada i matada en la prizyon.
Sus palavras de alkavo: si vengo al mundo de muevo, syempre azeria lo ke ize.
SARAH SCHENIRER (1833-1935)
Sarah fue pionera de la edukasyon de las ijas i de las mujeres djudiyas ortodoksas. Fondyo una eskola de ijas en Polonya yamada BAIS YAAKOV. Eya no fue solo profesora, fue kapache de trokar las ideas radikalas de las mujeres relijyozas.
Su palavra de alkavo: keridas elevas, el destino de Israel esta en vuestras manos.
