Muy Keridos Korelijionarios,
Este anyo estamos fiestando el “Pesah” ke mos sinyala la primavera i nuestra libertad djuntos kon el ”Shabat” bendicho.
“Baruh Sheeheyanu Vekiyemanu Veigianu Lazeman Aze”
Espero ke esta buena koensidensia mos vayevar a meditar sovre la santedad de “Shabat” i de “Pesah” en konsiderando el exodo del Ejipto de nuestros ansestros, ke estos dos okupan la importansa sentral de nuestra existensia. Siendo ke nozotros, los Djudios, semos los eredores meresientes de una kultura i modo de bivir durante kuarenta siglos, no mankamos de dar la importansa meresida seya al “Shabat” i seya al “Pesah” todo en akseptando i mostrando estos ultimos komo la baza de nuestra existensia en todas las epokas i en todas las partes del mundo.
No ay dubyo ke en este kampo mos gia el testamento de Moshe Rabenu “Veshinantam Levaneha” i lo ke se esta mansionando en la Agada de Pesah “Veigadta Levinha Bayom Au” ke estos dos mos enkomendan de Ensenyar/Transmeter/Enkulkar a nuestros ninyos. Es solamente en este modo ke puedemos venser la monotoniya i la endiferensya. No se deve de olvidar ke monotoniya i la endiferensya mos kavza de perder nuestra idantidad. Keridos Ermanos, Aze mas de dos anyos ke la epidemiya mos aprezo a nuestras kazas i en estos diyas ke estamos kaji a la fin, lo ke mas muncho mos atrista es la mankura de nuestros keridos i keridas en el deredor del pranso de Seder a kavza de esta epidemia. Si los nombramos kon kerensya i ardor, kreo ke puedemos adjuntarlos moralmente a nuestro Seder. Yo lo va azer espero ke vos adjuntesh kon mi. Keridos Korelijionarios,
Siendo ke “Pesah” es Hag Aaviv/Fiesta de Primavera”, mos akorda la renovasyon de la natura ke es la nueva enerjia ke nos enspira. Mirando de este punto de vista, esto kontente de ver ke todas las institusiones i fondasiones en nuestra komunidad estan fonksionando perfektamente i kon grande veluntad donde siempre les esto augurando buen eksito. No kale olvidar ke la solidaridad es lo ke sostiene a la komunidad. Devemos de apoyar a nuestros ermanos ke toman parte en estos lavoros. Siendo yeno de estos sentimientos i pensamientos vos bendigo a kada uno i una de vozotros kon las bendisyones de la santa Tora en suetandovos un Pesah yeno de sanedad, alegriya i pas djuntos kon vuestros serkanos i keridos.
Shabat Shalom.
Hag Pesah Sameah
Rav İsak HALEVA
Gran Rabino
