Si estash suivando la prensa, la televizyon o otros medyos sosyales, por seguro estash oyendo o vyendo la abundansya disproposyanada de deskuvyertas i avansamyentos en el kampo teknolojiko i mediko ke esta salyendo en el Estado de Israel. Si mirash de mas serka o investigash un poko mas, vash a ver ke munchos de los ombres i mujeres detras de estas deskuvyertas i enventos son graduados del Technion – Instituto de Teknolojiya de Israel. I komo egzaktamente estamos en su sentenaryo, en este mez de Avril, kije darvos unos kuantos detalyos sovre esta eskola.
Establesido el 11 de April de 1912, el Technikum (komo se yamava orijinalmente) fue pensado, kreado i patronizado por un fondo Djudio alman. El eskopo i la esperanza era ke la eskola iva ser una alternativa viable para los Djudios de la Evropa ke en munchos paizes no teniyan el derecho del todo o una kota chika limitada para asistir a la universidad. De fakto, kon la venida al governo de los Nazis, el Technion se izo un refujyo, un abrigo para munchos siyantifikos briyantes ke fuyeron de la Evropa.
Aunke la primera pyedra se metyo i el fondamyento del Technion empeso en 1912, los estudios no empesaron en la eskola asta 1924, el anyo kuando avyo sus puertas a su primera promosyon de disesh estudiantes (inkluida una mujer). La eskola tuvo munchos segidores notavles, inkluido Albert Einstein, ke ensombro el primer palmye djusto enfrente del primer edifisyo orijinal en 1923. Una de las prensipales razones del retardo fue las fuertes diskusyones i debates sovre la lingua de instruksyon: Alman o Ivrit, ebreo.
El primer kampus del Technion se fraguo en la rejyon Hadar de Haifa. Se mudo a su muevo i engrandesido kampus en Nave Sha'anan, en el este de Haifa a la fin de la dekada de 1970 i oy Technion tyene 10 lokasyones akademikas, 52 sentros de investigasyon i un ospital universitaryo afilyado. Kuatro profesores de Technion fueron nomados a los premiyos de Nobel i una grande kantidad inkreible de los graduados de la eskola son líderes en la industria de alta teknolojiya dispersados kaji en el mundo entero.
