Pesah es una de las tres fiestas ke yamamos “shalosh regalim”. Estas fiestas se konosen tanbyen komo fiestas de “pelegrinasyon”. Es ke en el tiempo del Bet aMikdash, los Djudyos de la tierra santa, deviyan de de irsen a Yerushalayim para selebrar “Pesah”, “Shavuot” i “Sukot”. Este viyaje ke aziyan era una pelegrinasyon i kon la palavra de oy, un “hadj”. Estos diyas de pelegrinasyon o “Hadj” se yamaron “HAG” en ivrit ke se puede tradusir komo “Fyesta”. Tenemos i otras palavras para dizir Fyesta, komo “Moed” o “Yom Tov”. Por esto mos felisitamos dizyendo: “Hag Sameah” o “Moadim le Simha”, lo ke kere dizir: “Ke la(s) fiesta(s) sea(n) alegre”. A saver ke estas fiestas se selebran 1 diya en Israel i 2 diyas afuera de Israel, en el Galut. En uno de los mozaikos del Muzeo de Kariye, ke agora es una meshkita i ke esta serrada, vemos este viyaje de Yosef, Miryam i Yeshu ke están en el kamino para kumplir esta mitzva i selebrar Pesah en Yerushalayim.
Según lo ke esta eskrito, la noche de la salida de Ayifto, deviyan todos komer kon adjile, tener los kalsados en el pye, aunke en kaza syempre se kedavan deskalsos, para pueder salir de kaza kon el baston en la mano ke iva servir para defendersen i deskansarsen. Todo esto porke de un momento al otro, puediyan resivir el orden de salir i empesar el kamino del egzodo.
La noche de Pesah, yamamos el “Seder”. Palavra ke kere dizir: “arreglar, organizar, ordenar”. Es ke devemos de observar, arreglar i organizar kon syertos rituales esta komida. Devemos de sentir la amargura kon el maror i la alegriya kon el vino. Devemos de ambezar a los kriyos ke mos demandan el porke de todos estos rituales. Esta noche es una de las noches ke toda la famiya se reúne i se envita a todo los keridos.
Pesah oy no es mas la salida de Ayifto i el kamino a la salvasyon de la esklavitud. Oy es la esperansa a la libertad spiritual i a la paz universal.
Hag Sameh i Moed Alegre.
