Leon Kopelman nasyo el 26 Abril 1924 i muryo el 13 Augusto 2021 a 97 anyos. El era el dalkavo sovrebiviente de la revolta del Getto de Varsovia ke fue en 1943.
Asta estos diyas dalkavo se pensava ke Simcha Rotem ke murio en 2018 era el dalkavo kombatante sovrebiviente de la revolta del Getto de Varsovia. Ma vimos ke aparesyo Kopelman. El, pretendio ke puede aver mas sovrebivientes ke guadraron el silensio.
En 1942, la Alemanya aviya okupado la Polonya i fundo el getto de Varsovia. Kopelman i su famiya fueron ovligados i forsados de enstalarsen aya. En el tiempo ke estavan en el getto, el se eskrivio a la armada sekreta judiya, ke rezistieron kontra las deportasyones judiyas verso los kampos de konsentrasiones.
Su madre fue deportada a Treblinka kuando el teniya 18 anyos. Ansina gerreyo en el alevantamiento judio la mas grande de la Sigunda Gerra Mundial, matando soldados alemanes. En 1943, Leon fue aferrado por los nazistos i se salvo de ser enviado a Treblinka grasias a una mentira ke disho ke era el un mekaniko eksperimentado. Ansina fue ke lo mandaron a un kampo de lavoro. En 1944, los kombatantes de la resistensya polaka lo liberaron. Un poko tiempo despues fue aferrado de muevo ma reusho a fuyirse i estuvo libero asta ke arivo la Armada Kolorada, los rusos.
Despues de la gerra, Leon Kopelman utilizo dokumentos de identidad falsos para viajar a la Italia. De aya se suvio a un vapor illegal ke partio a Israel. En Israel, se reunio kon el resto de su famiya. Su ermana i su padre ke sovrebivieron del Olokosto. Despues se eskrivio a la armada israeliana i gerreyo en la gerra kontra los arabos en 1948, la gerra de la independesya. I tanbien en 1967, en la gerra de 6 diyas. Despues sirviyo komo reservisto en la armada Israeliana asta sus 55 anyos. Sus ijos i su ija tanbien sirvieron en el IDF komo ofisyeres. Leon diziya i se glorifikava siempre en diziendo ke su grande famiya fue la mayor viktorya sovre los nazistos.
Su mujer Hava kon ken estuvo kazado durante 70 anyos, murio unos kuantos mezes antes de el, en 2021. Eyos tuvieron tres ijos, mueve inyetos i tres bizinyetos.
La lucha de Leon Kopelman kontra los nazistos i por la independensya i supervivensia de Israel nunka sera olvidada. Ke su rekuerdo seya por siempre bendicha.
