El sigundo Alhad de Mayo, es el Diya de las Madres. No puede aver en el mundo una madre mas jeneroza ke la madre judiya. La madre judiya es tan protektora ke esto esta arivando a un grado eksesivo i konstitue ´un stereotipo´ ke puedemos topar mezmo en los livros.
El stereotipo de la madre judia es tanto un stereotipo komun komo un personaje ke utilizan los komedyenes, eskritores de sine i televizyon, aktores i otores judios i no judios en los Estados Unidos i en otros lugares.
El stereotipo jeneralmente es una madre chacharona, ke avla muncho, muy protektora, otoritaria, ke insiste en mesklarse en la vida de sus ijos mezmo despues ke se izieron adultos i es ekselente para azer ke sus ijos se sientan kupavles por las aksiones ke la izyeron sufrir. El stereotipo de la madre judia tambien puede kontener una madre amoroza de sus ijos i demaziya orguyoza de eyos enfrente de los otros. Las madres judias son tambien orguyozas de sus komidas. Eya ensiste ke sus ijos koman mas, i se aravyan si no komieron sus komidas. Munchas vezes tanto los kontrola a sus ijos ke sus ijos se sienten ke se van a aogar de este komporto.
La madre judiya forsa sus ijos a reushir en la eskola i en la vida i a kazarsen si no estan dayinda kazados. Sus ijos para eya son dayinda chikos, mezmo si tyenen sinkuenta anyos. Ay una dicha ke dize, 'El ombre judyo ke tyene su madre en vida, es un mansevo de kinze anyos'.
La madre judiya se inkiyeta por sus ijos, se espanta de permeter ke agan syempre lo ke keren, porke eya egzajera los perikolos de la vida afuera de kaza. Esto es la enfluensya de la kultura judiya ke se formo en la diaspora. Eya ensiste en la immaturidad de sus ijos .
El judaizmo tradisyonalmente da grande emportansa a la kaza i a la famiya. Es por esta razon ke la madre es un personaje emportante en la famiya. Este sendrom de la madre fuerte es el rezultado de la filozofiya judiya tradisyonal: el ombre dirijando el mundo eskterior i la mujer okupandose de su famiya i del echo de kaza.
Ademas, en la istorya, las kondisyones fızikas i psikolojikas de las komunidades judiyas siempre fueron tan difisil ke las madres judiyas deviyan okuparsen de sus kreaturas a un grado eksesivo: "Tu deves de lavorar dopyo de los otros para reushir en la vida" diziya la madre judiya a sus ijos.
