Keridos lektores, Alhad pasado era el Dia de las Madres. Kije prezentarvos 4 poeziyas de mi madre, Coya Delevi ke no esta mas podyendo eskrivir.
TU SOS Mİ MADRE
Tu sos komo suenyo, ma sos verdad,
Tu syempre kon mi, sos mi realidad.
Tu sola me ensenyates la umanidad,
Tu sos simbolo de buendad i amistad.
Tu sos pedronansya de mi pekado,
Tu nunka mankates de mi lado,
Tu fuites mi luz arrelumbrando,
Tu, repuestas a lo ke demando.
Tu no sos una pluma en el ayre,
Tu sos rosiyo sovre la yerva vedre,
Tu sos la ke bushko manyana tadre,
Tu en mi korason, tu sos mi madre...
2006
TANTOS ANYOS SIN TI EN KADA SEZON EN MI KORASON
(a la memorya de mi madre)
Oy es el sigundo Alhad de Mayo, Tu estas en mis diyas, en mis sezones,
Ay mas de ventisinko anyos yo, Para tan kererte ay munchas razones.
Ke los esto pasando sin ti... Sos tan freska komo la Primavera,
Tu no estas mas a mi lado, I en mi korason la primera.
Me manka tanto tu kudyado, En ti la kayentura del Enverano,
Tu boz, tu riza, tu kerensya, Sin ti yo me syenteriya guerfano.
Esta muy fuerte tu absensya... Vezes, sos triste komo el Otonyo,
Oy es el diya de las madres, Tu melankoliya me aze danyo.
Ma, nada no esta komo antes, No se kualo avlar por el Invyerno,
Entonses tu no estas kon mi... Dizir ke sos yelada no lo puedo.
2007 Tu, no solo en mi kada sezon,
Tu Madre miya, tu en mi korason.
LA KONSEJA DE DOS MADRES
Dos madres, las eroinas de esta konseja,
Moravan muy serka, la mizma kaleja.
Del mizmo market empleavan,
Sin una vez saludarsen.
En mizmo kuafor se penyavan,
Sin una vez sonreirsen...
La una tiene ijo, afuera meldando,
La otra, ija a los vente entrando.
D’esto eyas no estando al koryente,
Son un diya prezentadas por la djente.
Dunke, era bueno, la djusta okazyon,
De pruntar “hal, hatir” i situasyon!..
Avlar siguro de los ijos, de famiya,
Esta okazyon no se topa kada diya!.
La una kon maestria, la avla dirijo,
Se ambezo muy muncho sovre el ijo.
I la otra tambien, kontente paresiya,
Pensando, se trata de buena famiya...
Muy klaro, a estas damas sintyendo,
Planos de matrimonyo van azyendo!!
Las sinyoras ke no se konosiyan ayer,
En dyez puntos se izyeron “djandjiger”!
No demandesh komo? Porke razon?
Eyas son “Madres”, esto es la kestyon..
Verdad, toda mujer es kazamentera,
Oy es ansi, i ayer era esta manera.
Mas i mas si son madres, kualo dizir?
Mas ke un “Mazaltov” i bendizir!!..
2005
