La perasha Emor nos da a entender la enkomendansa de santefikar el nombre de El Kriyador, Kidush Ashem. Komo esta dicho: “no esbivles el nombre de mi santedad, i sere santefikado entre el puevlo Djudyo”. Esta enkomendansa es una mitsva ke devemos afirmar todos en kada momento. El savyo grande, Arambam dize; Tener la kreyansa en Kriyador, i esperar todo de el es santefikar su nombre”.
En la bibliya meldamos: Hananya, Mishael i Azarya, los amigos de Daniel fueron echados a el fuego, por el nombre grande del Kriyador, i fueron salvados kon los milagros ke izo el Santo Bendicho el. Tambien la perasha trata por la santedad de los Koanim. Los Koanim no se deven enkonarsen en ninguna manera. El puevlo deven de onorar i santefikar a los Koanim. Komo lo vemos en la Alaha, eyos deven suvir primeros a la Tora, kuando egzistiya el santuvaryo las primeras frutas de los kanpos i vinyas, los primeros frutos de las ovejas. Ansi ke el Koen Gadol deviya ser amigo i ermano de todo el puevlo.
Tanbien en la perasha meldamos detalyos tokante las fyestas Djudias.
Diya de Kipur es diya de perdonansa para la nasyon Djudiya. Tokante a el diya de Kipur dizen nuestros savyos, si alguna persona pensa de pekar anyo enteroi ke en Kipur el ya va ser perdonando siguramente se yerra. Si no ke deve de arepintirse i azer teshuva i deshar su pekado i no repetarlo mas.
El Kriyador es piadozo; el se apiada de sus kriyansas i el nos perdona. Ma las kulpas ke akometimos verso nuestros amigos o keridos o verso alguna persona, devemos de demandar pardon ke nos perdonen, estonses nos perdona el Kriyador.
Tokante la fyesta de Sukot, ansi lo meldamos en la Tora, syete diyas devesh de morar en las kavanyas (Sukot); vos ize morar en las kavanyas kuando vos kiti de Mistrayim.
Moshe Rabenu ekspliko en la Tora kada fyesta i fyesta; de aki nos enbezamos ke se deve de repetar i avlar las reglas, la estorya i los kustumbres (uzos) de kada fyesta en su tyempo. Tambien la perasha kontinua el sujeto de kontar Omer, kuarentimueve diyas ke es syete semanas de kontar de Pesah asta Shavuot.
Los Koanim son los ke aserkan a el puevlo verso El Kriyador. Los Korbanot, los sakrifisyos enaltesen a el puevlo. El dover de los Koanim en el tyempo ke egzistiya el santuvaryo era tambien de edukar a el puevlo, i arelumbrar a el puevlo kon la luz de la Tora.
