La semana pasada komo era el Bayram de Ramadan no pudimos eskrivir un artikolo en el Şalom, i vozotros no puditesh meldarmos. El diya dalkavo del Bayram, kon mi mujer, dospues de la Corona, viyajimos i mos fuimos al lado de mi ijo ke esta estudiando en Toronto. Eskapo sus dos anyos de la universitad i asta oy no pudimos verlo en Toronto. No desharon los paryentes; kale 15 diyas dospues 10 diyas de karantina; testes por aki, i testes por aya… Reelmente no fue muy fasil vinir a Toronto. Esta vez dimos karar 3-4 mezes antes i merkimos los bilyetos para vinir. Un avion de la Turkish Airlines yeno de djente de las kuatro puntas del mundo. Kreo ke no avia Turkos ni halis Kanadienes en el avion. Munchos Iranianos, Chinesos; Indianos; Pakistanianos; Gurdjis… Un alay de Kanadienes, la mas grande partida aedados ma ke no konosian ni el inglez, ni el fransez. Dishimos ke es un payis ande no biven Kanadienes. Ma kuando vinimos a Toronto i mos enstalimos en un buen otel en el downtown de la sivdad, todo troko. Es djusto ke ay un alay de Chinesos i de Indianos ke biven en este payis ma fueron edukados i se adaptaron a la vida del payis. Kuatro diyas dospues, diya de alhad, era “El diya de las Madres”. Esto siguro ke era el mizmo diya en Kanada. Ay dos mezes ke piedri a mi madre. Ke su alma repoze en Gan Eden, no topi a dingunos para felisitar su diya komo lo fiestava kon mi madre. Demanyana devia en primero felisitar mi mujer, antes ke mi ijo le telefone, dospues felisiti a mi esfuegra i dospues a mi ermana, todo kon telefones i whatsappes. Eskapi mis felisitasiones telefonando a mi ija ke es madre los syete anyos dalkavo. Dospues embiyi mesajes de whatsapp a siertos grupos. Entendi por la primera vez ke era difisil de ser sin madre…
Vos esto eskrivyendo mi artikolo de Toronto. Es oy ke mos fuimos los tres, mi ijo, mi mujer i yo, al Royal Ontario Museum (ROM) ke es uno de los mas famozos muzeos de Toronto i ke aklara la djente sovre las bestias, los animales i todo modo de objetos arkeolojikos de los Gregos, Romanes; Ejipsianos. Reelmente formaron un muzeo kon 13 miliones de artikolos!
Va eskapar mi artikolo dandovos el haber de un konsierto ke estamos realizando en Edirne. Es el 22 del mez de Mayo ke estamos realizando el konsyerto de musika Djaz del pyanisto Israelyano Guy Mintus kon su trio i la kantadera Naama Nachum. Los bilyetos kostan 300 i 350 liras kon el transporto de Estanbol asta Edirne i dospues del konsyerto tenesh la posibilitad de komer en la guerta de la Grande Sinagoga de Edirne. Puedesh tomar i topar los bilyetos telefonando a Emel: 0535 3500778 / a Tilda del Şalom 0212 2318379 / a Dalia: 0532 2341135 o Elda: 0533 7630076
Reelmente va ser un viyaje i un konsyerto maraviyozo. Tenesh poko tyempo. Ayde al telefon…
