Lag BaOmer se selebra para komemorar el diya dee la rezistensia de los kreyentes judios giados por Bar Kohba, (uno de los rebeliones de los kreyentes judios) kontra los opresores paganos del Imperio Romano. Esta rezistensia se eskapo kon viktoria. En mezmo tiempo, este diya, la epidemia de peste ke se aviya propajado entre los estudiantes de Rabi Akiva, se eskapo tambien. En otro aspekto, Lag Baomer, koinsida kon el aniversario de la muerte de Ribi Shimon Bar Yochai, ke transmetyo el Zohar de una manera ke todos puedan entender, i ke es el personaje el mas importante del mistisizmo judio.
Lag BaOmer se rekuerda komo un diya de selebrasion amarga i dulse en el kalendario judio, porke Ribi Shimon Bar Yohay aviya enkomendado a sus elevos ke selebren este diya kon alegriya en lugar de yorar su muerte.
El periodo de Omer entre la segunda noche de Pesah i Shavuot, fue shaet a munchos eventos tristes en la istoria, en partikular la muerte de los elevos de Rabi Akiva. Por tanto, este periodo se konsidera komo dias de dolyo, en la kual no se realizan kazamientos, no se aze entretenimientos, ni muzika.
Kuando la epidemia ke mato 24.000 elevos de Rabí Akiva milagrozamente desparisio, el 18 de Iyar, ke es el 33en diya de Omer, Lag BaOmer empeso a selebrarse kon alegriya.
Kualos son los tristes eventos ke tuvieron lugar en el periodo del Omer?
-24.000 elevos de Rabi Akiva ke era uno de los mijores estudiozos de la Tora de la istoria, perdieron la vida en la epidemia porke no amostraron respekto unos a los otros. De esta manera, se destruyo una grande parte de la Tora ke puediya vinir fin oy.
-Los masakres de los judios durante los romanos i los kruzados tuvieron lugar en este periodo.
-En la epoka del emperor Adriano, las rebeliones debasho del governo de Bar Kohba para ekspulsar los romanos de sus tierras, no reusheron, i miles de judios perdieron la vida.
-Komo rezultado, vieron ke Bar Kohba no es el Mashiah ke estavan esperando. De esta manera, la esperanza ke el mundo ya vino al final de dolor, el sufrimiento, la pena, i ke la era de la paz, la onestidad, la justisia i la ‘kreensia al Dio’ vino, no se realizo.
En este diya, el rabino Akiva empeso la formasion de sinko muevos elevos para transmitir su sensya: el rabino Meir, el rabino Yehuda ben Illai, el rabino Yosi, el rabino Shimon Bar Yohai (Rashbi) i el rabino Elazar ben Shamoah. Todas las sensyas orales de la Tora konosidas oy en diya se konservaron grasias a estos sinko elevos.
