Avia muncho tiempo ke no estava meldando Paulo Cuelho. Kon su livro famozo, “el alchimista”, ke se vendio mas de diez miliones de egzemplarios, se izo un autor mundial i fue onorado kon “la lejyon de onor” i komo kavelyiero de letras i de arte en Fransia. Su kamino avia empesado en estudiando el derecho, ma vido ke su vokasion era el teatro i la muzika. En los anyos 60, endjuntos kon su amigo, Raul Seixas, eskrivieron mas de sien kansiones de “rock”. Era un tiempo de la diktatura en Brazil, i siendo antikapitalisto, se fuyo a Londra para kontinuar a lavoraror en el sektor muzikal. La otra pasion de Paulo era la literatura, i kuando su livro “el alchimista” se izo famozo, desho sus otras okupasiones para kontinuar a eskrivir. En rodeando en la libreria, su romanso filozofiko “El kamino del Arkero” bushko mis ojos para ke lo merke.
Este livro es una lision ke puedemos aplikar a muestra vida. El kamino del arkero puede ser el kamino de la alegria i del entuziasmo, de la perfeksion i de la eror, de la teknika i del instinkto. En su istoria, el otor mos kere mostrar:
En primero, ke bivir en komunidad, enserklados de djente ke partajamos la vida, mos sierve a konoser muestras propias kalidades i defektos.
Segundo, ke el arko simboliza la fleksibilidad kon sus limites. Devemos de estar en armonia kon el arko i no egzijar mas de lo ke mos puede dar. En tirando el arko, el ekilibro i la serenidad son los aktos los mas importantes, komo en el momento de desiziones importantes en la vida.
Tresero, ke la flecha reprezenta la inisiativa, el projeto. El bolar de kada flecha es diferente. Puedes tirar mil deas, i kada una te amostra un kamino diferente. Si los movimientos antes del lansamiento de la flecha no son korrektos, no devemos de tirar. La abilidad teknika no es bastante sin ser maduro i pozado.
P. Cuelho a traves del arte del tiro, mos eksplika ke las personas deven de saver ke en kada aspekto de la vida, las desiziones tienen un proseso i en jeneral nada no viene kon sorpreza. En muestros enkontros kon las personas, devemos de oirlas, respektarlas antes de djuzgarlas. Este kamino es el mas konveniente para mijorar muestra vida i de los ke estan al muestro rededor.
“Ambezate ke un tiro korekto i sertero es muy diferente de un tiro kon paz en el alma.” P. Cuelho
