La karestiya de la vida fue siempre un fakto muy emportante en el mundo entero i naturalmente en muestro payis. Yo me akodro, en mi chikes, mis paryentes mos kontavan del tiempo de la gerra ke no se topava produktos de mantenimyento, lo mas emportante era el pan. Sovre todo verso la fin de la sigunda gerra i en los anyos de despues, el pan i el kimur eran dados kon karne. Antes los nifuses eran komo defteres. En el defter de mi padre aviya estampas ke ya le dieron "pan” i “klavos”. No se deke le dieron klavos porke mi padre era emprimante.
Otra koza ke se keshavan eran los presyos de las kiras de las kazas. Por esto fue un tiempo ande moraron dos o tres famiyas en la mizma kaza. La grande mayorita de akel tiempo moravan en kazas kon kiras. Muy poka djente teniyan sus kazas, los muy rikos. Los merkaderes pensavan ke “el echo traye kaza, ma la kaza no traye echo” por esto las paras ke teniyan las metiyan a sus echos.
Vineremos a la situasyon de oy. Ay unos kuantos mezes ke todo esta pujando otomatikamente. Ampesando de la elektrisita, el gaz natural, la benzina, la agua i todo mas. Sovre todo las kiras pujaron a dopyo o a tripyo. En las Islas aparte de la karestiya de las kazas, no se esta topando kazas para alkilar por modo ke ay munchos etranjeros ke keren morar aya enverano i invyerno.
De un diya al otro no se esta topando nada al mezmo presyo. La otra noche, en un program de ekonomiya en la televizyon, un partisipante disho ke mas no se esta enkantando ke estan pujando los presyos, ma se esta enkantando si topo un artikolo ke no pujo. Sanki ay una mano ke no vemos ke esta aboltando una manivela sekreta en la plasa, para ke puje todo, de “la alguja al ilo.”
Un produkto vital de mantenimyento ke es la karne, esta rompyendo rekores. Sovre todo la karne kasher se esta bolando. Por siguro ke i los karneseros tendriyan sus razones.
Si demandas por la sanedad, el Dio ke no mos aga kayer en las manos de los doktores i ospitales, ke estan kemando las aldikeras. Yene, ke no mos manken.
El Dio ke ayude a los ke no tienen muncho poder. Kurto, no savemos ande mos estamos yindo. De arogar es ke tengamos salud buena.
