Silva Filiba
Un savio muy konsiderado i konosido, indose de una sivdad a la otra se topo ovligado de pasar una noche de tempesta en la kazika de Moshon, el odundji i su mujer Hanna, la lavandera. Entezado i ambierto, se asento el savio al lado de la sobika i bendisho al Dio Baruhu. Moshon i Hanna muy onorados de aresivir una persona de tanta emportansa no saviyan kualo azer, korriendo de un lugar al otro. Moshon echando un lenyiko despues de otro a la sobika i Hanna kitando todo lo ke tiene de mijor del almario del mupak.
Pishin izo burmuelos enkandelados de sharope i los trusho al savio kon kavod grande. El savio ke vido los burmuelos i golyo su ermoza golor, disho en su korason: Esto es el parfumo del Gan Eden. I tomando un burmuelo se lo metyo a la boka en dizyendo: Yo komo uno de eyos porke uno es el kriyador, el Dio Baruhu. Pishin tomo otros dos ke son Moshe i Aaron, tres deyos otros por los tres padres de la ley, Avraam, Yitzhak i Yaakov. No puede ser sin madres komyo kuatro deyos para Sara, Rifka, Rahel i Lea. La kara kolorada del plazer i la tripa yena, el savyo vazyo el chini. Hanna muy kontente yetishtereyo otro un plato. Esta vez fue la sira de los sinko livros de la ley. Bereshit, Shemot, Vayikra, Bamidbar i Devarim. Los sesh burmuelos fueron komidos en bendizyendo los sesh diyas de la semana sin Shabat i pishin siyete diyas kon el Shabat. Hanna va i vyene trayendo burmuelos. Los ocho diyas del Berit se kontaron i despues los mueve mezes de la prenyada. Kuando tomo a kontar i komer los dies komandamientos de la ley, Moshe se fue koryendo al mupak i grito: Hanna Hanna, por sedaka ke no traygas mas. Moz va kedar en las manos si se mete a kontar las Mitzvotes. Son sheshentas i tredje. Guay si penso a los ke salieron de Ayifto. Akeyos eran sheshentos mil.
Kon bueno lo kontaremos kon sanedad mos alegraremos. Enveranada buena teneremos i eskapadura de todos los males veremos.
