Kuando oyemos u meldamos una novela, si vemos ke ay un nombre djudyo de vista tomamos parte, un futbolista ke reusho, una artista u byen un direktor de filmos ke tomo el Oscar, empesamos, mira es djudyo u es djudiya. Mezmo si no lo konosemos mos da orgolyo. Para munchos mansevos, esto es fashismo ma lo mas semos esta manera.
En pasadas meldi ke se troko el Primer Ministro de la Fransya, no es ke so muy interesada en la politika ma me vino muy enteresnte.
La mueva prezidente es ija de un survivante del Olokosto. Bushki su vida i meldi ke nasyo el 18 de Avril 196,1en Paris.
En Fransya, las desizyones se komparten entre el primer ministro i el prezidente. El prezidente de Fransya nombra a uno de los myembros del partido ke tyene la majorita en el parlamento. La persona ke se konvertira en primer ministro no es ovligada de ser deputada u senator. Puede ser myembro del mezmo partido del prezidente u de otro partido.
En el protokol, se prezenta antes del Prezidente del Senato, dospues del Presidente de Fransya. En la deklarasyon del palasyo Elysée, se anunsyo la demisyon de Castex i Elisabeth Borne ke es la mueva Primera ministra. Elisabeth Borne es la segunda mujer ke tomo este titro dospues de 30 anyos.
Borne lavoro komo Ministro de Lavoro, Ministro de Transporte i Ministro de Ekolojia.
En su deskorso, su palavra de alkavo fue: "a los 61 anyos, me ize primer Ministro de la Fransya; esto sera para mi un siglo muevo."
