Avram Mizrahi
Un nono se fue a paseyar al bodre de la mar kon su inyetos. Los inyetos se meten a djugar en la safra i en supito una ola grande vyene i lo trava el mas chiko de los inyetos a la mar. El nono kon espanto i estrechura aze loores al Dio: Todo Poderozo, te rogo traymelo atras!!! I en supito otruna vez una mas grande ola lo traye el inyeto sano i rezyo al lado del nono. El nono lo abrasa, lo beza i despues mira a los sielos i dize: "el chiko teniya un chapeyo?"
Un grande Haham mos desha la buena vida i suve a Gan Eden i uno de los malahin lo resive i lo akompanya a un pranso en su onor. "Te vamos a prezentar un porsiyon de karne savoroza, el peshkado el mas fresko i el vino famozo." El Haham demanda, "i ken fue el Masgiah por este pranso?" "Ah, le reponde el Anjel "a tu onor el Santo Bendicho".
El Haham le dize, "Mersi muncho ma ya iva abastar el peshkado".
Un grupo de personas, un Amerikano, un Ruso i un Israeliano se topan sovre una entrada al metro, i un jurnalisto se aserka i les demanda: "Kon muncho pardon es ke vos puedo demandar vuestra opinyon sovre la mankura de karne? El Amerikano le dize: Kualo es mankura? El Ruso: "Kualo ez karne? El Israeliano: "Kualo es Muncho pardon?"
Tres madres djudiyas asentadas en un banko en el parko estan konversando. Kada una dize ke su ijo la kere muncho bien. La primera dize: Mi ijo me enbiya kada Shabat flores muy ermozas. La sigunda, "esto yamas amor? Mi ijo me yama kada diya kon el telefon!!" La tresera dize: esto es nada, "mi ijo esta en terepia ande el psikiatrio, i ande el todo el tiempo avla sovre mi!!!"
