Dia de Alhad pasado era Shavuot. Vos kije eskrivir sovre un personaje relatado kon Shavuot.
Rut era la mujer moabita (Moab es el nombre de un antiguo reyno levantino, su teritoryo se topa oy en la Jordania) de Mahlon, uno de los dos ijos de Elimeleh i Noemi, una famiya ebrea ke aviya fuyido de Betlehem durante una ambyertura muy fuerte i larga. La famiya de Elimeleh se aviya establesido en Moab, un pais vizino kon ken Israel teniya una istorya de konfliktos.
Kuando Elimeleh i kaji diez anyos despues, sus dos ijos muryeron en Moab, Noemi desidyo a tornar a su tyerra natal, Israel. Sus dos ermueras, Rut i Orpa, (segun syertos, Rut era la ermana de Orpa i las dos eran ijas de Eglon, el rey de Moab) desidyeron ir kon eya. Kuando tomaron el kamino de retorno, Noemi insistyo a sus dos ermueras ke tornen a las kazas de sus famiyas. Orpa aksepto i se torno a su famiya. Ma, Rut, al kontraryo, no aksepto i le disho a su esfuegra: “Ande tu [Noemi] te vas, i yo me va ir, tu puevlo va ser mi puevlo… tu tyerra va ser mi tyerra, i tu Dio va ser mi Dio” (Livro de Rut 1:16).
A sus retorno a Betlehem, Rut i Noemi tuvyeron una vida solitaria i prove. El puevlo del doredor la akuzavan de fuyir en famiya durante la ambyertura malgrado ke eran muy rikos i de otra parte no teniyan dinguna konfiyensiya en su ermuera moabita. Para no murir de ambre, Rut arekojiya el ekseso de sevada ke kedava durante la rekolta en el kampo de Boaz, un paryente de Elimeleh. Esto kontinuyo dias i dias. A la fin, Boaz se apersivyo de Rut i de las kalifikasyones unikas de Rut de modestiya, fidelidad i umilidad i le permityo a Rut de kontinuar arrekojer la sevada en su kampo asta la fin de la rekolta.
Noemí saviya ke Rut era devuada i sinsera i de mas estava preokupada por el futuro de su ermuera. Le konsejo a Rut ke se vayga a la festividad de fin de rekolta i ke tope aya a Boaz, ken fue tan jenerozo kon las dos mujeres. Le disho a Rut ke se prezente a el komo una posivle kandidata de espoza i le aseguro a Rut ke Boaz no iva kedar indiferente sovre esta propozisyon.
La noche de las festividades, Rut topo a Boaz, se aserko de el i le disho sus entansyones komo le konsejo su esfuegra. Boaz, ke era muncho mas ayedado de Rut, muy riko i proprietaryo de munchos kampos, i uno de los lideres de la komunidad, no aviya pensado asta esta noche de topar una kandidata de espoza i de kazarse (syertos dizen de kazarse de muevo).
A la fin de esta istorya, Boaz i Rut se kazaron i sus ijo, Oved, fue el granpapa del rey David.
El Livro de Rut se melda en Shavuot, porke, segun la tradisyon, Shavuot es el aniversaryo del nasimyento i de la muerte del rey David.
