Oy diya de Alhad vos esto eskrivyendo mi artikolo asperando mi vuelo para Estambol en el aeropuerto de Stockholm.
En primero kero partajar la tristeza ke bivi la semana pasada djusto kuando termini mi artikolo para el Şalom i mi mujer me telefono para demandarme, si lo ke sintio era djusto. De kualo estas avlando? I le demandi lo ke se estava pasando. Me disho ke Esti Saul se murio en su kaza. Le dishe ke no era posivle i le dishe ke iva mirar al grupo de whatsapp, “Kazika …”. Miro i veo ke malorozamente es djusto. Era muy difisil de kreer a la muerte de Esti. No savia la edad ke tenia. Ma komo avlo su ijo, Rıfat, el diya de los funerayes, kada diya se vistiya henozamente i kada diya kon el makyaj… Dingunos no la konosen kon un hal eskayido. Era ennamorada por el arte. Mizmo la mas grande partida de sus artikolos en judeo-espanyol eran sovre el arte. I dos diyas antes ke mos desho la buena vida, telefono a Karen para dizirle, ke va eskrivir un artikolo sovre Habib Gerez ke era un pintor i poeta bastante renomado. Ma no fue kismet.
Esti me ayudo kada vez ke tenia de menester de eya. Lavorava komo una manseva. Dısheron ke su vida topo fin asentandose en el fotolyo i bevyendo kafe. Se bolo komo un pasharo. Ke ermoza fin para eya; ma no para los ke kedan atras. En el grupo de Sefarad no se ken eskrivyo ke "Es Viktor ke la yamo!”. Dizen ke era un grande amor. I ay apenas un anyo i medio ke Viktor mos desho la vida.
35 anyos antes kuando fondimos la Kaza de Arte para ekspozisyones en el Şalom, la primera ekspozisyon fue realizada por Habib Gerez. I estava pensando ken va ser la/el artisto o los artistos ke van a realisar la segunda ekspozision? Demandi a syertas personas. Estavan pensando lo ke la djente va avlar dospues; “se izo artista”. I reelmente Esti Saul i Suzy Hug Levi toparon el koraje de ser las artistas de la segunda egzibisyon i tuvyeron un grande sukseso. Dospues munchas personas toparon el koraje de azer egzibisyones. I eyas realizaron munchas egzibisyones en Turkiya, mizmo en diferentes payizes.
Esti, ke tu alma repoze en Gan Eden!
Deke esto eskrivyendo mi artikolo de Stockholm? Ay unos kuantos mezes ke Aydemir Ay de la Munisipalidad de Edirne ke me esta dizyendo ke embiyaron los livros sovre las Komidas Djudias de Edirne a una organizasion ke da premios a los livros, a las revistas i oy en diya mizmo a los sites de internet. I los estavan yamando para ke esten en Umea el 4 de Junio. A la fin di karar de irme. Fue reelmente muy difisil el ir i vinir de Stockholm asta Umea.
Ma la Munisipalidad de Edirne reusho a resivir el primer premio en los livros sovre las komidas Djudias. Vamos a vender el livro kon una banda: “Gourmand Award 2022-Jewish Cook Books”. Vos kero kontar mas munchas kozas ma no tengo mas lugar.
