Riyeremos

Al kontrario de mi padre, mi madre era una mujer muy pratika.

Nada podia detenerla. Kual ke fuera el problem, mi madre savia muy bueno komo arreglarlo.

Un egzamplo perfekto de esto afito kuando yo tenia siete anyos. Kantavamos kon tres amigos judios de muestra maalle. Le dimos el nombre "El Kuartet Peewee" a muestro grupo.

Un dia, se iva organizar el piknik anual de la kadena de los grandes magazenes Siegel & Cooper. La partikularidad del piknik era ke se iva organizar un konkurso de kantikas kon la partisipasyon de los koros reprezantantes de las eglizias de New York. No me esto akodrando komo vino este haber a muestra maalle, ma era muy emportante para mozotros.

Komo no aviya dingunos en muestra maalle ke iva partisipar en la kompetision, el muhtar kijo ke muestro grupo partisipe. No puediyamos pedrer esta oportunidad. Pishin akseptimos. .Ansi, akel Alhad, el Kuartet Peewee, kuatro ijikos judios partisipando por la eglezia, estavamos en la shena. Muestra primera kantika era "Scottish Eyes Smiling". Duspues kantimos la kantika "Para mi madre" i ganimos la kompetision. Komo regalo, mos dieron kuatro ermozas oras de braso.

Estava tan emosionado ke koryi a kaza para darle el haber a mi madre. Kuando vine a kaza, mi madre estava enkolgando el lavado en el balkon. Presto presto suvi las eskaleras i le dishe: "Mama, yo no kero ser judio".

Mezmo ke lo ke le dishe la sorprendo, no lo amostro. Me miro kon kalmo i me disho: "Te importa si te demando deke keres esto?" eya demando.

Le dishe: "So judio desde aze siete anyos, el judaizmo no me dio nada. Reprezentimos la eglezia por un dia i me dieron una ora de braso".

 En este momento, ekstendi mi braso i le amostri el regalo a mi madre.

Miro a mi ora, i me disho: "Ayudame a enkolgar este lavado en primero, i duspues puedes azerte kristiano", me disho.

En enkolgando el lavado enriva la kuedra, unas gotas de agua me koryeron por el braso i entraron en mi ora. Mi ora se bozeyo. Ansi me desidi a kedar judio.