I esta semana tanbien vos va kontar una konseja ke paso entre el inyeto i el nono. Estos evenimyentos ke pasan entre inyeto i nono me plazen i me tokan muncho porke yo teniya un nono kon ken eramos muy serka. Era kerensyozo i muy pasensyozo. Mos kontava pasajes de la istorya, de su chikes i de la Tora. Lo kontava tan ermozo ke mozotros lo oyiyamos kon la boka avyerta i pasavan las oras porke no mos artavamos.
Un ombre aedado ayego a la Amerika en los anyos ’60. El inyeto de 16 anyos tomo ensima el kargo de azerle konoser la sivdad i el entorno de ande moran. Tanbien el modo de bivir “a la Amerikana”.
Un diya el inyeto le dyo randevu a su nono en la kafeterya de la kyoshe. Aspera aspera, el inyeto kedo tadre. Kuando entro el inyeto, lo vido al nono asentadiko en una meza vaziya.
-Deke no komites nada asta ke vine yo? demando el inyeto.
-Ya kije komer ma no vino el garson a demandarme lo ke kero, le respondyo el nono.
Le tomo una riza al inyeto i disho:
-Aki no ay garsones, aki es kafeterya, le disho el inyeto i ampeso a kontar.
-En primero te vas al empesijo. Tomas un tefsin, piron i kuchiyo; despues vienes delantre de las komidas diferentes ke se topan en la vitrina i eskojes lo ke keres, las dulsuryas se topan a la fin i kuando eskapas de tomar lo ke keres te vas a la kasha i pagas todo.
El nono miro lo ke aziya la djente, despues se penso un poko i disho:
-Ya entendi, djusto komo en la vida.
El inyeto no puediya entender lo ke saviya el nono, ke aviya vinido de un payis non-developado.
Se enkanto i le demando lo ke keriya dizir.
-La vida es aproksimadamente komo la kafeterya. En primero tomas los instrumentos komo el piron i el kuchiyo. Estos son “tu edukasyon”. Despues ampesas a eskojer lo ke te viene delantre en la vida.
Ken toma la primera koza ke le viene delantre, ken asta ke da karar, se eskapa lo ke ay, ken eskoje lo ke eskoje el ke se topa delantre de el, ken toma lo ke dingunos no toma, ken ya save lo ke kere, se va lo toma, ken toma poko, ken toma muncho, ken toma lo ke ve ermozo ma despues sale amargo, i ken al arovez. Ken se va a eskojer solo las dulsuryas ma lo ke kere ke eskojga, a la fin lo ke paga es lo ke eskojo el.
La sola diferensya ke ay entre la vida i la kafeterya es ke: En la vida no entiendes ke lo ke pagates es el presyo de todo lo ke eskojites tu mizmo!
