Desde 1290, anyo kuando los Djudios fueron arrondjados asta al anyo de 1650 ke se empeso a akseptarlos, a los Djudios no era permitido de bivir, de establesersen afilu de entrar a la Inglaterra. Ma de otra parte, los anusim, Djudios de Espanya i Portugal ke se aviyan konvertido al kristianizmo solo de nombre para evitar la muerte, eran bienvenidos. Por lo tanto, los akademikos estan spekulando ke el tipo model de William Shakespeare para Shylock de el merkader de Venezia fue el Dr. Rodrigo Lopez, un marrano akuzado de la ultima trayizion.
Vos va kontar su istorya:
Nasido en Crato, Portugal en 1525, el Dr. Lopez se enstalo en Londra en 1559. Fue un doctor en el Ospital St. Bartholomew i syempre tuvo munchos hazinos de altos rangos de la sosyedad. En 1586, el Dr. Lopez fue nomado el shef doktor de la Reyna Elizabeth I.
Akel tyempo, la politika en la korte de Elizabeth era muy kompleksa i intrifikada. I de otra parte, los sujetos enternasyonales eran un labirento de aliansas. La Inglaterra protestana i la Espanya katolika estavan kontinualmente aprovando a ser mas grande mutualmente. Komo parte de una investigasyon averyta sovre un komploto para asasinar Don Antonio, el kandidato al trono portugez (ke biviya en Inglaterra), Robert Devereux, segundo Duk de Essex, akuzo subitamente al Dr. Lopez de konspirar kon los espanyoles para entosegar la Reyna.
La evidensya kontra el Dr. Lopez era fabrikada i era sin dinguna baza. Ma es ke es de saver, debasho de una tortura muy larga en la sinistra Kula de Londra, el Dr. Lopez konfeso ke lo aviyan abordado sovre el plano de entosegar la Reyna, ma esto afito kuando estava frekuentando la korte espanyola en tal ke espiyon britaniko. Dr. Lopez fue kondenado. Despues de kuatro mezes de ezitasyon, achakes sus propyos dubyos sovre su kulpabilidad, la Reyna afirmo el akto i el orden de ekzekusyon. El 7 de Junyo de 1594, el Dr. Lopez fue enforkado, i su puerpo arrastado i despedasado.
Asta oy kedaron dubyos i demandas sin respuestas sovre el Dr. Lopez. Malgrado sus fuertes gritos i protestos de inosensya i de kreyensya relijyoza (publikamente se deklaro kristiyano), el Dr. Rodrigo Lopez kedo markado para syempre en la istorya komo el doktor djudio ke bushko a entosegar la Reyna Elizabeth I.
