Kualo es la muerte?
La muerte es; la fin de las aktividades vitales de un bivo, de una persona.
Todos los bivos del mundo son mortales, pasajeros.
Esto muy emosyonada de la piedrita de mi kerida amiga del “djudeo-espanyol”, del koro “NES”: “Esti SAUL”. Lavorimos kon eya en diferentes organizasyones i asosyasyones de muestra komunita.
“Esti SAUL” (z.l.) mujer artista, pintadora, fina, luzya, syempre los ojos riyendos kon una atitud novle, delikada, serro los ojos antes una semana; djusto komo un pasharo se bolo allado de su marido kerido.
Eya aktiva, eya kapache, madre akorrida de sus ijos, mujer perfekta de su marido, amiga fidela de sus amigos, i munchas otras kalidades…
Esti era konosida kon su arte, kon sus tablos maraviyozos, kon la kapachita de organizar egzibisyones i de asistir i de tomar premyos seya en Estambol, seya en diferentes paizes de la Evropa.
Esti Saul empeso a pintar en el anyo 1955, kontinuo en los anyos 1986-1997 en el muzeo de pintura i skulptura en estudyando la pintura i la istorya del arte.
Sus ovras de akriliko, pastel i pintura se renkontran en varias koleksyones en Italya, Israel, Suedya, Alemanya i otros paizes.
Tuvo munchas egzibisyones ke organizo eya mizmo solo kon sus tablos i asistyo a egzibisyones kon otros artistos.
Esti eskriviya en el jurnal “Şalom”, en la revista “El Amaneser” en djudeo espanyol i mos dava novelas sovre los artistos famozos del mundo.
Kada semana era un plazer para mi de meldar el kanton del arte ke eskriviya Esti.
Kerida Esti, mos deshates la buena vida. Ke tu alma repoze en Ganeden. Estamos muy tristes i abatidos de peryer a una amiga, una ermana koma ti.
Pasensya a tus ijos, tus inyetos i a tu kerida famiya. Syempre vas a bivir, aryento de muestros korasones...
