Estas semanas dalkavo vos esto eskriviendo de las kuatro puntas del mundo. Esta semana vos esto eskriviendo de Frankfurt. Esto en el Kongreso de los profesyonales de los muzeos Djudios Evropeos. No so profesional. Ma para ambezarme munchas kozas, fue una okazion emportante.
Este kongreso se esta realizando en el muzeo Djudio de Frankfurt, ke fue renovado durante tres o kuatro anyos i fue inogurado un anyo i medio antes. Es un muzeo ke apartyene al ministerio de la Kultura.
Devemos de saver ke la mas grande parte de los muzeos apartyenen a los Ministerios de la Kultura en todos los payizes.
Kreo ke esto empeso dospues de la segunda Gerra Mundial i en munchos paizes para los evenimientos ke fueron realizados kontra los Djudios; esta vez keren azer konoser lo ke se paso en la segunda Gerra Mondial i todos los evenimientos antisemitikos. Kreo ke es un poko para demandar “pardon”. La Alemanya es el payiz ande estan avriendo munchos muzeos; mizmo syertas Grandes Sinagogas komo la sinagoga de Munich.
En un panel, estava avlando el Presidente del Muzeo Polin ke se topa en Polonya. Resivio el premio de “mijor muzeo Evropeo”. Estamos endjuntos kon Nisya, direktrisa de muestro muzeo i me dize ke es uno de los mas emportantes muzeos de Evropa. Avlando disheron ke 190 personas lavoran profesionalmente para este muzeo. I el buto el mas emportante es de azer vijitar las kriaturas i los elevos para ke se ambezen syertas kozas sovre el Djudaizmo.
Esto pensando la Alemanya Nazista ke dyo karar para matar milyones i milyones de Djudios; i la Polonya ke fue el teritorio ande miliones de Djudios fueron kemados oy en diya ofisialmente estan lavorando para azer konoser el Djudaizmo a las muevas jenerasyones.
El mundo esta trokando, i los payizes Evropeos se estan trokando. Oy en diya la Alemanya es un payis ande munchos Djudios keren ganar sus vidas, lavorar en sus profesiones i bivir en repozo. Vemos ke oy en diya la populasion djudia es mas alta de la ke era trenta anyos antes (de 30.000 almas djudias asta 120.000).
