La vez de alkavo empesi el proyekto de las emigrasyones en Turkiya, i oy esto kontinuando kon las emigrasyones durante la Sigunda Gerra Mundial.
Este sujeto empeso kon la vinida de la otoridad de los Nazis en la Alemanya, en el anyo 1933 i sureya fista el anyo 1945 ke a la fin se entregaron a las Fuersas Aliadas.
Mas de 340.000 Judios abandonaron la Alemanya i la Austria, ma pekado ke las 100.000 personas de los emigrantes, se fueron a los paizes ke fueron okupados un kurto tiyempo despues por los Alemanes, i fueron la majorita matados u bien embiyados afuera de las frontyeras.
La Alemanya okupo la Austria en Marso 1938 i spesyalamente despues de la Noche de Kristal, ke afito el 9-10 Novembre 1938.
El oksidente de la Evropa i los Estados Unidos estuvyeron en inkiyetud del empesijo de una emigrasyon.
Entre Marso 1938 i Septembre 1939, de los 120.000 refujyados Judios, los 85.000 arivaron a los Estados Unidos, ma este shifro era muncho mas abasho del shifro de los ke demandavan viza i ke entraron al rango en los konsolatos de los Estados Unidos.
Fina el mez de Junio 1939, mas de 300.000 personas demandavan viza, ma la majorita no pudyeron tomarla.
Bolivya aksepto 20.000 Judiyos entre los anyos 1938-1941, la Republika Dominikana en la konferensya de Evian en 1938, deklaro ke esta pronta a resivir munchos emigrantes Judyos. En mayo 1939, los Estados Unidos no resivyo a los 900 Judiyos, vinidos de Hamburg-Alemanya kon transatlantiko i enfin la Ingletyera, Fransya i Olanda aresivyeron a estos emigrantes. De las 908 personas, las 254 fueron matados en el Olokosto, los 620 fueron retornados a la Evropa i los 366 kedaron sanos despues de la gerra.
Mas de 60.000 Judyos Alemanes emigraron a las tyerras de Palestina en 1930 achakes del Pakto Haavara entre la Alemanya i la Palestina.
Los paizes ospitalyeros de diya en diya se apokaron. Miles de refujyados Judyos Alemanes, Austrianos i Polonezos emigraron a Shangay, debasho del kontrol de la Japonya, Shangay International Settlements, resivieron 17.000 Judyos.
En la sigunda mita del anyo 1941, las nuvelas del sujeto de asasinos fue infiltrada a los paizes del oksidente i achakes de estas nuvelas, los Estados Unidos limitaron mas las kondisyones de vizas. Las limitasyones de los Inglezes, una kuantidad limitada de Judyos fueron akseptados illegalmente por “Aliyah Bet” a la palestina. El governo inglez aresivyo 10.000 kreaturas judyos por el proyekto Kindertransport.
La Suiza aresivyo 30.000 refujyados Judios i en mizmo tyempo refuzo los mizmos shifros de la frontiyera.
Despues de la Gerra, siyenes de miles de personas fueron embiyados ovligadamente a los kampos de los Paizes Aliados en la Italya, Austria i Alemanya. En el sistem de Kota, a los refujyados ovligotaryos fue dado la prioridad de Emigrasyon achakes de la Doktrin Truman i kon esta okazyon 16.000 personas Judyos pudyeron entrar a los Estados Unidos. Ma la limitasyon de resivir emigrantes dainda estava kontinuando en la Amerika.
