Despues de un largo invyerno ya vino enverano i bendicho el Dyo, ya esto en la kampanya. Enverano, lo mas muncho ke me plaze es la demanyanada i la kayades. Me alevanto muy demprano, tomo el kafe, me asento en el balkon, respiro el aver limpyo, miro las rozas ke avyeron, los pasharikos ke chuflan i esto me da plazer. Kuando pasava una talika, la boz ke saliya de las nalchas de los kavayos me dava iluzyon ke esto en otro siglo. Akeas oras pensava, sera ermozo de bivir syen anyos antes, vistir fostanes largos, chapeyos elegantes, guantes i azer el torno grande kon talika. Ma ay dos anyos ke se alevanto las talikas de sorte ke i las bozes de las nalchas no estamos oyendo. Agora estamos kaminando kon otobuses i taksis de elektrik, el torno de la ada ke era kaji una ora lo estamos azyendo en kinze puntos, por siguro ke para mozos, los vyejos moradores de las adas no es el mezmo plazer. Mozos semos una jenerasyon ke bivimos lo vyejo i lo muevo endjuntos, si el Dyo mos da vidas, ken save kualo mas vamos a ver. Ma sigun mi, kale auzarse a lo muevo, si no, no puedemos ser aktual.
Ken diziya ke kon un telefon entelijente, pizando en una tush, ivamos avlar kon la Amerika, una boda, una fyesta, mezmo un funeral lo estamos vyendo a punto en zoom. Atras 40 anyos, yo en la kampanya no teniya telefon de kaza, fuimos ovligados de asperar kuatro, sinko anyos para ke mos venga el torno. El ir vinir a la ada era un evento. La frijider yena de vidreriya, la makina de lavar yena de kalsados, kamas, kolchas i kolchones, chantas i torbas yenas. Solo la radyo i kozas de valor viniyan a la tadre kon el balabay. Komo troko la vida. Kuando aviyamos visto el filmo de James Bond, aviyamos kedado kuryozos ke kon un boton estava vyendo ken vino a la puerta de abasho. Agora lo tenemos en kada kaza i kuando sona la puerta vemos ken vino. Komo estos miles de egzemplos.
Troko la vida, troko i las ideas mezmo. Al tyempo, kazar kon una persona non-djudia era fin de mundo, era azer kriya. Agora kuando mos avizan un espozoryo u un kazamyento demandamos,
--- Ken son los koshuegros, la repuesta es:
--- No los konoses; i mozos de vista le dizimos:
--- Mazaltov, bueno ke pasen.
Por egzemplo una si dize,
---Este mansevo es gay,
--- No ay nada, es su preferensya seksual,
--- Tu ijo ya kazo?
--- No se kazaron, biven endjuntos,
--- No emporta, orozos ke esten,
--- Dospues de kinze anyos, se kitaron
--- Si no estava oraza, muy bueno izo
--- La novya entro al kal la tripa en la boka,
--- Bravo, te vas azer nona en presto!
Tengamos una enveranada alegre kon sanedad i kon inovasyones buenas.
