Anyos antes, las kantikas eran un elemento inseparavle de la vida sefaradi. Muestras nonas i nonos no teniyan ni radyo, ni televizyon komo oy. Los vizinos se arekojiyan en una kaza, i los ke teniyan bozes ermozas kantavan kon eskarinyo las kantikas, las romansas ke fueron trayidas de Espanya.
El estudyo sovre la muzika sefaradi esta amostrando la vitalidad de esta muzika. Munchas de estas kantikas i romansas guadran la savor del rekuerdo i del eskarinyo de una vida ke no egziste mas.
Kantadas de jenerasyon en jenerasyon, munchas fueron pedridas o olvidadas. Para ke no se pyedran todas, los muzikologos se fueron a las komunidades sefaradis para notarlas. Estas kantikas i romansas son el reflekto de la vida popular.
Estamos vyendo influensas del oryente i del oksidente en la muzika sefaradi por modo de las emigrasyones i los kontaktos kon otros puevlos.
En la muzika sefaradi, las kantikas ekspresan diferentes sentimentos. Algunos ekspresan alegriya o tristeza. Otros ekspresan el amor de los namorados, amor orozo o amor trajiko. Ay kantikas ke kontan las desgrasyas komo las gerras, los fuegos, las epidemiyas o los terremotos.
Esta kantika ke va sitar esta kontando un rash ke uvo en Bulgaria: ‘Noche de djueves, madre, la orika dando dos, un rash fuerte se sintyo, ke la sivdad la estruyo. Arogando al Patron del Mundo, ke mos embiye piyadad’.
‘La klosh sono, Sulucha no eskolo, Ke guay de su madre, La ija ya bolo’. Esta kantika triste esta kontando la piedrida de una kreatura.
‘Anyo sheshenta i kuarenta i kuatro, fuego en sesh de kislev, este fue negro empesijo de los syelos abasho negro gostijo. No kedo kortijo ande aviya mezuza, kedimos sin kamiza, sin techo i sin bankos, en medyo los kampos. Grande derrokamyento fue para el prove i el riko, el gevir i el esnaf, todos a un piko. El governo riko, el Rey Sultan Hamid, mando munchos zabites ke miren la manziya de la juderiya. Mando el rey sinko mil dukados, ke miren de aremendar a todos los kemados’. Esta kantika es sovre un fuego ke afito en Estambol en el anyo 1903.
Komo en estas kantikas, los puevlos sefardis kompozaron kantikas eksprimando sus sentimyentos sovre los evenemyentos emportantes. Ay evenemyentos ke akontesen en la istorya de un puevlo i ke no se pueden olvidar. Estas kantikas kedaron komo una forma de memorya de la istorya.
Algunas kantikas son sovre muestras fyestas komo las kantikas de Purim, de Tubishvat i de Pesah. Otras son kantikas de boda, de paridura, de kuna, i de kreaturas. Miles de estas kantikas fueron enrejistradas.
Estas kantikas son de grande valor por los investigadores, los folkloristos, i los kantadores. Los kantadores sefardis ke keren enrikeser sus repertoryos se syerven de esta koleksyon anrejistrada.
En egzaminando esta koleksyon de muzika, se puede ver la rikeza i la ermozura del folklor sefardi ke kale ser guadrado komo un trezoro.
