Despues ke salyo el livro de “Tenten” en Ladino, se topo otro Tenten kon su aventura en Hayfa.
En supito se oyo un anunsyo: “Rezidentes de la Tyerra de İsrael”, un sivdadano de Beljika, de tendensya a kitar bela, vistido komo un Arabo, se vido en Hayfa. Esta persona se dyo el nombre de “Tenten”. El es konosido komo uno ke aze envestigasyones ande no deve de azer i demanda munchas demandas. Si alguno save ande se topa esta persona, rogamos de yamar la polisiya”.
Komo lo entenditesh, este anunsyo salyo en uno de los livros de la famoza koleksyon de “Las Aventuras de Tenten” publikado en 1939-1940 kon el nombre “Tenten en la Tyerra del Oro Preto”.
La istorya mos avla de un komplo sekreto de sabotaj ke se deviya de azer en pozos de petrol en el Medyo Oriyente i la persona mala de esta istorya es el Aleman Dr. Müller. Muestro Tenten, vistido komo un Arabo, i kaminando en las kayes de Hayfa, fue arevatado por el Irgun, la organizasyon sekreta ke lucho i kon los Arabos, i kon los Inglezes.
El pintor de estas aventuras, Georges Prosper Remi, konosido kon el nombre “Hergé” estava embiyando sus ovras estando en el servisio militar. Djusto el diya ke los Almanes entraron a Beljika, lo kitaron del servis militar porke tuvo una fuerte sinuzita. Naturalamente por modo de la gerra, korto de pintar las aventuras, i los lektores tuvieron de esperar anyos para saver komo Tenten se salvo de la furtuna de arena en el dezyerto i de las negriguras del malo Dr. Müller.
Fuente: Chen Malul
