La semana pasada vos dishe ke estava en Frankfurt en un semposium sovre los Muzeos Djudios de Evropa. Dos vezes tuve la okazyon de vijitar dos simeterios. El primer ke era mas chiko se topava al lado de la sala de Ekspozisyones ande estan ekspozando syertas kozas sovre el Olokosto. I en la pared se topan los nombres de las personas ke estan en este simeteryo i ensima ay un pedaso de piedra ande puedesh meter una o dos piedras; komo lo metesh ensima de la piedra de la tomba.
I dos diyas dospues avia un torno para el mas antiguo simeteryo de Frankfurt ke es kompozado de 4 partidas diferentes. Normalmente en este simeteryo la djente fueron enterrados del 18en siglo asta el empesijo del 20en siglo. Entre los ke vijitavan avia una syerta damma de los Estados Unidos i otra de Romania ke estavan bushkando syertas tombas kon los nombres i el lugar ande se topa la tomba. Ya puedesh topar un alay de tombas de los Rothchildes. Es de Frankfurt ke se fueron a Paris; Londra; Viyana i otras sivdades.
Es por la primera vez ke vide la forma de las tombas de los Ashkenazes Alemanes. Vos va mostrar en la foto. Mos amostraron otras tombas ke apartyenen a Djudios ke fueron matados en los Kampos en Alemanya i las famiyas merkaron sinizas de muertos mizmo si no
eran las de sus maridos, sus mujeres o sus kriaturas. Una grande desgrasya: merkar sinizas de no se ken, para pueder tener una tomba!!!
El sinyor ke mora en una kaza en el simeteryo mos amostro el simeteryo ke se topa aryentro ande son enterrados soldados ke gerrearon por la Alemanya durante la Primera Gerra Mundial.
Estash viendo lo ke es posivle de kontar solo por un simeteryo.
Esta semana en la Sala de Konsyertos Cemal Reşit Rey, el 30 del mez de Junio, estamos envitados por el Konsul de la Republika Chek. En este konsyerto muestra amiga, Renan Koen va tomar lugar. El koro Lusarovich de los Armenios; un koro grego; el koro de los Asireenes i el koro Nes i el koro de las Estreyikas d'Estanbol van a tomar lugar. Kreo ke va ser un konsyerto bastante enteresante. Ya se ke el Gran Rabino de la Republika Chek va estar en el konsyerto i en su onor se va organizar dos pransos. El primer, noche de Shabat en la Sinagoga de Büyükada i el segundo, noche de Alhad en el Klub Anadolu kon komidas kasher.
Reelmente van a ser unos diyas muy enteresantes.
