Dr. Albert Abraham Bourla, prezidente i direktor egzekutivo de Pfizer, resivyo un doktorado honoris causa del Presidente del Technion - Instituto de Teknolojiya de Israel, el profesor Uri Sivan, durante la seremoniya de graduasyon de 1.869 estudiantes universitaryos de Technion. Dr. Bourla resivyo el premio “en rekonosimyento a su eksepsyonal talento de lider en el avansamyento rapido en el desvelopamyento de una vaksina segura i efikasa kontra el COVID-19; kon gratitud por ser pionaryo monumental frente a una kriza global; i en admirasyon por su firmo fidelidad a la sensya ke enkarna los mas altos valores i standardes de ekselensya en la inovasyon sientifika”.
El Prezidente de Technion, Prof. Uri Sivan disho ke “Komo prezidente i direktor egzekutivo de la direksyon de Pfizer Inc., Dr. Bourla dirijo los esforsos de desvelopamyento piyonaryo para una vaksina kontra el koronavirus. El desvelopamyento de la vaksina COVID-19 es una reushita bioteknolojika ekstraordinarya ke aksentua la importansya de la sensya i la bushkida multidisiplinerya. La vaksina ayudo a salvar al mundo de la kriza ke empeso a la fin de 2019, kon la epidemiya. La istorya de la famiya de Dr. Bourla, komo ijo de sovrebivyentes del Olokosto en Salonika, es un simbolo de la vitalidad del puevlo djudio, su bivasidad i su kapasidad de renovasyon despues del Olokosto”.
Dr. Bourla se adreso a los estudiantes kon un diskorso inspirador. “Komo siyentifiko i djudio, no puedo egzajerar la sinyifikasyon para mi de resivir este titulo i ser invitado a adresar la klasa de graduasyon de este anyo. Desde ke avriyo sus puertas por primera vez en 1924, el Technion fue un manadero de luz no solo para Israel, sino para el mundo entero. La istorya del Technion, komo la de mi kompanyia, Pfizer, es una istorya de inovasyon, ma tambyen de koraje i optimizmo, todo ayudando a los desvelopamyentos teknolojikos i siyentifikos destinados a azer del mundo un lugar mas mijor.
“La inovasyon, el koraje i el optimizmo son tres kozas ke deskriven mis kolegas de Pfizer. Se nesesita koraje para tomar la desizyon kontrarya a la intuisyon de utilizar la teknolojiya de mRNA en la vaksina COVID-19 ke desvelopimos kon BioNTech. Este koraje no solo mos ayudo a prezentar una vaksina segura i efektiva en solo mueve mezes, sino ke tambyen puede rezultar en un paso importante para dezblokar la grande promesa ke la teknolojiya ofrese para munchas otras areas terapeutikas, inkluzo el kanser i las hazinuras raras. Muestro viyaje mos amostro ke podemos azer posivle el imposivle, i muestros kolegas agora estan yevando este muevo optimizmo a sus lavoros en otras areas”.
Eskapo sitando el injenyo umano, la kompasyon i la reushita, komo valores ke deven tomar los diplomados komo egzempiyo. “Agora ke se aserkan las munchas alternativas ke vash a tener en vuestro viyaje, akodravos syempre de pensar alto, ser rezistente i ser optimisto en todo lo ke vash azer. Si lo azesh, no va ser una surpriza de ver lo ke vash a reushir”.
Dr. Albert Abraham Bourla nasyo en Salonika en 1961 en una famiya djudia, parte de la kual peryeron la vida en el Olokosto. Su famiya, ke yego a la Gresya desde la Espanya en 1492, lavoravan kon djoyas i diamantes, i su negosyo se ancheyo a munchos paizes. La komunidad djudia de Salonika, al tyempo la mas grande de Gresya, teniya una povlasyon de aproksimadamente 80.000 en la dekada de 1930. Aproksimadamente dos tersyos peryeron la vida en el Olokosto.
Dr. Bourla kompleto todos sus titulos akademikos en la Universidad Aristoteles de Salonika i tyene un doktorado en medisina veterinaryo i bioteknolojiya reproduktiva. En 1993, entro a Pfizer, una de las prinsipales kompanyias biofarmasotikales del mundo, ande okupo una seriya de postos. Supervizo el desvelopamyento de antipuerpos i tomo el posto de prezidente del grupo de VOC, la seksyon global de vaksinas, onkolojiya i kuras de Pfizer. En Oktubre de 2018, fue nomado direktor de operasyones de Pfizer, en 2019 fue nomado direktor egzekutivo i en 2020 tomo el posto de prezidente de la kompanyia.
Un doktorado onoraryo es el onor mas alto ke otorga el Technion, el Instituto de Teknolojía de Israel, a los pokos eskojidos por sus lavoros siyentifikos o ser lideres i servisyos publikos en favor de Israel, el puevlo djudio i la umanidad en jeneral. Algunos egzemplos notavles inkluyen a Chaim Weizmann (1952), Albert Einstein (1953), Niels Bohr (1958), David Ben Gurion (1962), Yitzhak Rabin (1990), Margaret Thatcher (1989) i Dr. Angela Merkel (2021).
