El 30 del mez de Junio estava envitado al CRR ke es una de las mas emportantes salas de konserto. Indome al CRR vide un alay de djente ke se estavan indo. Kualo era la razon de este konsyerto? A las 12 de la noche la Republika Chek devia de ser prezidente del EU (Union Evropea). I el Konsul de la Republika Chek, Jiri Cistecky ke da muncha emportansa al arte muzikal i a todo modo de arte dyo karar de organizar un muzikal. I lavoro kon un artisto Chek ke es Djudyo; el dirijante de koros, el Sinyor Peter Györi. Reelmente fue un lavoro muy reushido.
Ken avia en este diya? El Gran Rabino İsak Haleva, El Patrik Grego Barthalomeos; el Patrik Armenio, Sahag Maşalyan; el Metropolit de los Asireenos Ortodokso, Yusuf Çetin i el Gran Rabino (sefaradi) de la Republika Chek, el Rabino Karol Sidon. La sala estava kompletamente yena.
Empesando el Konsul Jiri Cistecky presento lo ke se va ver en la shena i disho ke es un proyekto ke keria muncho ke se realiza. El konsyerto empeso kon la prezentasion del Kuartet de Kontrabas de la Universitad de Mimar Sinan. Detras de los muzisyenes se topava en la segunda shena 90 personas ke eran parte de kuatro koros. El Koro Ortodoks Asireen; el Koro Armenio Lusavoriç; El Koro Dafnes del Metropolit Grego de Tarabya i los Koros dirijados por İzzet Bana: el koro NES de las mujeres ke kantan kantes sefardis i las Estreyikas D’Estambol. Todos kantaron dos kantikas solos i a la fin del konserto tomaron parte al kante dalkavo ke era un kante djudio: “Veisheamda”. En la shena tuvimos la posibilidad de segir todo modo de muzika; de muzika turka, a la muzika Jazz; de la muzika klasika a la muzika moderna. Dospues de dos oras es el shef Györi ke tomo lugar en la shena i realizo kon todos los muzikos i koristos el kante “Visheamda”. Reelmente los ke partisiparon estavan muy kontentes de esta prezentasion. Durante el konserto rengrasyaron a muestra amiga, la famosa pianista, Renan Koen por su ayudo en esta realizasion.
Reelmente devemos de rengrasiar al Konsul Jiri Cistecky i al muzisiano Chek, Peter Györi.
