‘En el empesijo del venten siglo, los judyos izieron grande progreso en la industria de la muzika. La industria de muzika fue un medio ande los judyos no se konfrontaron kon antisemitizmo’ esta diziendo Micheal Feinstein, el ganador judyo del primer premio Emmy.
‘White Christmas’ eskrito por el muzisien judyo, Irving Berlin, fue una de las mas ermozas kantikas del anyo 1942, i enkorajo a munchos muzisienes judyos i non-judyos a eskrivir kantikas de Noel.
Seguro ke los muzisienes judyos no estavan voluntarios a selebrar el nasimiento de Jesu. Por esta razon, eskrivieron solo kantikas non-relijiozas de Noel.
‘Las kantikas de Noel ke son populares no son sovre Jesu’ esta diziendo Feinstein.
Los judyos ke biven en la diaspora tienen dos kulturas: la kultura de sus relijion i la kultura del pais ande eyos biven. Feinstein esta diziendo ke en los paizes kristianos ande los judyos biven, Noel se selebra komo una fiesta nasional, i munchos judyos tambien partisipan a esta fiesta, i kantan las kantikas de Noel.
Barbara Streisand izo un album de Noel. Neil Diamond tambien izo tres albumes de kantikas de Noel. Este anyo, la muzisiena Idina Manzel ke empeso a kantar por las bar mitzvas i ke se izo populara kon las kantikas del filmo ‘hit’, ‘Frozen’, izo tambien una kantika de Noel, ‘Holiday Wishes’.
Kuando les estan demando a estos muzisienes, deke no azen kantikas de Hanuka, en lugar de kantikas de Noel, estos muzisienes estan respondiendo ke tienen munchas razones por esto.
La primera razon es ke los muzisienes tienen menester de munchos oyentes para pueder azer kantikas ke les enteresa. Los judyos konstituan los dos por sien de la populasion de los Estados Unidos, los kristianos ochenta por sien. Muy pokas personas merkan CD’s de las kantikas de Hanuka. Munchos amerikanos no konosen la estorya de los Makabis, i no se mezmo enteresan.
La segunda razon es ke Noel es una fiesta ke puedes empleyar munchos imajes. Hanuka es mas steril, no ay munchos imajes ke se puede empleyar en eskriviendo kantikas.
La tresera razon es ke kantikas de Hanuka egziste solo en las linguas ebreo, ladino i yidish. No egziste kantikas de Hanuka kompozadas i eskritas en inglez.
Ma, dainda ay esperansa. La muzika de Hanuka esta kresiendo de diya en diya. Matisyahu izo la kantika ‘Miracle’ en inglez. El grupo Maccabeats izieron la kantika ‘Candlelight’. Esta kantika se izo ‘hit’ en poko tiempo.
Kenny Ellis, el kantor de la Sinagoga Beth Ami de Santa Clarita, Kalifornia, esta mirando a konvenser a los muzisienes para ke metan kantikas de Hanuka en el livro de las kantikas nasionales. Kenny Ellis izo un album, ‘Hannukah Swings’, ande un grande grupo estan kantando las mas populares kantikas de Hanuka. Mezmo Feinstein esta kantando la primera kantika de este album.
Esperamos ke kon tiempo, otros muzisienes van a suksedar, i van a azer munchos albumes de Hanuka.
