Ken no konose a “Mona Lisa”, la pintura famoza del pintor italyano, Leonardo da Vinci? Todos los turistos ke tienen la okazion de vijitar los muzeos de la Fransia, entran al muzeo Louvre ke se topa en Paris, para admirar este tablo. Ma los turistos no pueden aserkarsen muncho de la pintura porke esta pintura se topa detras de un djam espesialmente godro ke lo separa de los vijitadores. Es ke siempre fue esta pintura muy famoza, bien guadrada?
Asta el empesijo del siglo 20, esta ovra no era mas emportante de las otras ovras de Leonardo. Munchos turistos viniyan al muzeo para mirar no solo la Mona Lisa ma tanbien i las otras ovras suyas. “Mona Lisa, era la sola pintura ke Leonardo da Vinci no kijo vender en toda su vida”.
“Mona Lisa” era el nombre de una mujer noble ke se yamava en verdad Lisa Di Born Gradini. Era la esposa de un merkader ke se yamava Francesco Di Zanubi Del Giocondo (ke en otras linguas se dize la Gioconda). Leonardo pinto este tablo en el anyo 1503 i le dyo el nombre “Mona” ke es la abreviasyon del biervo “Madonna” (Madam en italiano).
Despues ke muryo Da Vinci, este tablo fue vendido por uno de sus elevos al rey de Fransia, François I porke Leonardo aviya murido en su guerta.
En el anyo 1911, “Mona Lisa” salyo a viyaje en Italia. Kero dizir ke lo yevaron de sivdad en sivdad para ekspozarlo. Un vijitador, pintor de 30 anyos ke se yamava Vincenzo Perogia, vido ke dingunos no estavan guadrando estos tablos. Desido de arovarselo, lo metyo debasho de su palto i salyo del Muzeo sin ke dingunos se apersiva i sin ke dingunos lo areta. Solo al diya sigiente el bekchi del muzeo se apersivyo ke el tablo no esta en su lugar.
Siguro ke se undyo el mundo. La prensa franseza eskrivio artikolos kritikandolos. El puevlo salyo a las kayes azyendo manifestasyones kontra el governo. El direktor del sentro fue arondjado i los bekchis fueron kastigados. La Fransia estava averguensada de este rovo ma esto sirvyo a ke la pintura seya muy famoza en el mundo entero.
Un diya “Mona Lisa” torno a Italia, a Firenze, al lugar ke eya nasyo. En Noviembre 1913, un antikaryo resivyo una letra sinyada “Leonardo”. El ladron estava demandando medyo milion de liretas del governo italiano porke diziya ke teniya munchos gastes. El antikaryo i el ladron se toparon en un otel para negosyar. El resepsyonisto se sospecho ke estavan rovando una foto del otel i yamo la polisiya. Perogia fue metido a la prezyon. Las otoridades se metyeron dakodro ke el tablo va ser metido en ekspozisyon anyo entero en diferentes sivdades de la Italia antes de renderla a la Fransya.
En Enero, 1914 la pintura fue metida a su lugar permanente ke es el Muzeo de Louvre a la onor de los reyes de Fransya. Mona Lisa inspiro a otros artistos komo Marcel Duchamps ke pinto la Mona Lisa kon mustachos i barva. Salvador Dali ke pinto la Mona Lisa kon sus mustachos tipikos. I Nat King Cole ke kanto la famoza kantika romantika “Mona Lisa”.
