La fiesta del sakrifisyo en la relijyon Muzulmana sige el kalendaryo lunaryo. Un kalendaryo muy paresido al muestro, kon la diferensya ke no se aze una regulasyon para resivir la fiesta en la mizma epoka, es dizir ke no azen komo mozotros ke adjuntamos un mez kada dos o tres anyos en un siklo de 19 anyos para selebrar la fiesta en la mizma zona. Kon esta regulasyon, la fiesta puede vinir a vezes un mez adelante, a vezes un mez atrás.
Estudyando el tema del sakrifisyo, topamos en esta palavra dos sentidos ke son “Sakro” i “Fisyo”. El primer es sakralizar, dar el sentido de santo, de sakrado. El sigundo tiene el sentido de azer, fazer. Uvo en la istorya mondiyal, sakrifisyo de animales i de umanos. Savemos ke esta uzansa fue pratikada en diferentes sivilizasyones komo los Sumeryos, los Hitites, los Misris de Misrayim, los Hindus, los Gregos antiguos, en Yerushalayim, i en los nativos de la Amerika…Otro sentido de la palavra “Sakrifisyo” es, pedrer una porsyon chika, para ganar una porsyon mas grande. En Turko “Sakrifisyo” se dize “Kurban”, palavra ke vyene del Ivrrit “Korban”. Otro sentido es dar una parte de su bien, para ayudar el malorozo ke sufre de mankura.
En la istorya mondiyal, el sakrifisyo de animal o a vezes de umano se pratiko para kalmar la ravya de los Dyozes, para tener buenos produktos, para agradeser i engrasyar los Dyos porke tuvimos una buena kozecha, para alimpyar los pekados, para mostrar el respekto ke tenemos por estos dyos. . A parte del budismo, este uzo se pratiko en las otras sivilizasyones. En el Budizmo no se ve de un buen ojo eksplotar i azer sufrir las otras kriyansas. De esto entendemos ke para eyos azer un sakrifisyo de animal no tiene sentido.
En el akto muzulman del sakrifisyo de Avram Avinu, aun ke se diga ke fue el akto de sakrifikar Ishmael, el Koran dize ke keriya sakrifikar su “IJO” sin mensyonar nombre. Este akto oy se selebra a la fin de la pelegrinasyon a los lugares santos komo la Kaaba ke ya era un lugar santo antes del Izlamizmo ande se topavan idolos i dentro de eyos “La Piedra Preta”. Oy aryento de la Kaaba, esta solo “La Piedra Preta” ke se pensa ke es un meteorito; agora savemos ke esta teoriya se aksepta manko después de los estudyos ke se izyeron sovre eya.
