Kuando eskapi el liseo ke tenia 17 anyos, tenia muncho dezeo de entrar a la Universidad de Estambol para meldar psikolojia. Ama no me se fado. Akel tiempo aviya munchos evenementos politikos. La vida traye sus difikuldades, sus kaminos, sus regalos i sus ermozuras. Lo ke se dezea o lo ke se pensa no es muy fasil realizarlo kuando keres tu. Envezes es ke estas enriva de una barka. Kuando gerreas kon la mar rebolteada, kuando te vas komo una pluma. I yo lavori, me kazi, tuve kreaturas, ayudi a mis abuelos, engrandesi a mis chikos, tuve inyetos. Aryento de estos anyos syempre me plazyo ambezar kozas muevas i estudiar. Lo ke pude azer. Kuando desidi de retirarme, salyo una ley de perdonansya a los elevos viejos ke no pudyeron meldar i keren tornar a sus eskolas. I yo de pishin torni a la eskola.
Todo estava komo lo deshi kuarenta anyos antes. Misma puerta, mismas klasas, mismas eskaleras. Lo ke se troko era las profesoras ke estavan todas mas chikas de mi. Ya mos izimos syete o ocho amigas en mismas edades todas retiradas i demuevo entrimos a los egzamenes, mos izimos amigos kon los mansevos i pasimos kuatro anyos muy valutozos kon eyos endjuntos.
Kuando vino la ora de ser diplomadas i djurar por la profesyon psikolojia, por mi, i por mis amigas era un suenyo ke se kompleto i estavamos muy muy orozas de echar los chapeos al aver kon todos los mansevos. Yo me emosyoni muy muy muncho porke komo esto un diya a los mansevos akompanyan las madres i los padres a mozos akompanyaron mi ija i ijo, mi marido i tambien mis inyetos. Kon mi inyeta kaminimos las klasas ande estudyi i esto todo le entereso muy muncho. Todos los elevos i los profesores mos abrasaron de korason i mos felisitaron.
El Profesor Doğan Cüceloğlu en un livro suyo famozo mos dize “todos biven el siglo suyo”. Para mi, el siglo me amostro este kamino, yo se ke los anyos estan pasando ama si la sensya i el provecho de la persona esta ayudando a azer, nunka no es tadre. Esto muy orgulyoza de ser egzemplo a mis inyetos. Agora tengo el dezeo de lavorar sovre las famiyas ke tyenen difikultades. Keridos lektores, en el livro Trezoro Sefaradi ay un refran ke me plaze muncho. “No es el lugar ke da onor al benadam, es el benadam ke da onor al lugar”. Rogo al Dyo poderozo todo los dezeos ke vos se realizen kon salud, kon parnasa buena, kon todos djustos.
