Enverano bushko aktividades porke sanos ke esten, los ijos estan en vakansas afuera la sivdad, teatros, filmos, reuniones de ovras no ay, de sorte ke busho movimyentos.
El 6 del mez de julio, en el kal de la Büyükada Hesed le Avraam, uvo una entrevista kon una damma ke konosesh muy byen, RANA DENIZER.
Rana Denizer, la duenya de la istorya de la seriya EL CLUB (KÜLÜP) ke mos yevo al pasado i mezmo tyempo inyeta de la verdadera MATILDA.
La entrevista paso entre RANA DENİZER i la kerida moderadora, LUİZA UÇKİ. Luiza le demando i eya konto su vida veramente komo un filmo.
No kazo i no tuvo kriaturas. Komo paso una chikes diferente de otras, sus suenyos i su dezeo era de kontar esta istorya pasyonante a todos. Meldo en eskolas etranjeras i universitas ma syempre kijo azerse senarista i parvino.
Eya konto munchas kozas ke no aviya en la seriya por siguro ke munchas kozas eran sekretos de su famiya. Lo ke no kijo ke se sepa en la seriya, lo esta eskrivyendo en un livro i kuando se va emprimar lo vamos a meldar.
Lo mas enteresante ke konto fue, eya fin sesh anyos no supo ke su madre i su nona Matilda eran djudias. Se engrandesyo sin ley; ni la madre ni el padre no kreiyan en ley. Komo moravan en Pera (oy Beyoğlu) se engrandesyo kon djente de munchas leyes, teniya vizinas gregas, ermeniyas komo Katina abla, komo Hayganush teyze de sorte el nombre de su nona Matilda no le vino al tino ke no es nombre turko. A la madre la yamavan Aysel. Un diya en kaminando en la kaye, rankontraron una konosida de la madre, la konosida la estava yamando a la madre Rashel kon boka yena. Dospues ke se fue la konosida le demando a la madre de ke te yamo Rashel? La madre le respondyo kuando era chika teniya kaveyos ingridos i en la eskola ke me iva, a ken teniya kaveyos ingridos la yamavan Rashel.
Eya kriatura a la noche se lo konto al padre en riyendo, el padre le disho ya es la ora ke sepas la verda i akea noche le dyo a entender ke la madre i la nona son djudias. Komo esto konto munchos rekuerdos de su chikes i de su vida ma kuando le demandi permisyon si puedo azer la notisya de esta noche a la revista shalom, me disho si ya puedes azer, solo no eskrivas todo lo ke konti porke tengo un akordo kon la konpaniya ke no kale ke de notisyas sovre la seriya KULUP temporada 2. Kuando empeso a avlar, la primera koza ke disho: a munchas demandas no vos va dar repuesta lo vash a ver kuando se va djugar. I yo le di palavra ke no va eskrivir todo lo ke konto, esta manera me permetyo.
Espero kuando lo vamos a ver en Netflix vamos a sintir los mezmos sentimyentos de la primera partida i vamos a suivar en un suluk las ocho partidas muevas.
