En jeneral, kuando afita una trajediya, munchos bushkan a deskuvrir un lado pozitivo, miran a topar eroes i sus sakrifisyos. En el panteon de eroes durante la Shoah (el Olokosto) se topa Chiune Sugihara, ke era el Konsul Jeneral de Japonya en la sivdad de Litvanya de Kaunas (tambyen konosida komo Kovno). Sugihara paso a este posto en Marso de 1939, sesh mezes antes de la invazyon Almana de la vizina Polonya. Los Djudios polakos i almanes empesaron a fuyirsen a la Litvanya. Ma, el estado de Litvanya komo refujyo se eskapo abruptamente el 15 de Junyo de 1940, kuando la Union Sovyetika okupo la Litvanya. Los Sovyetikos permityeron ke los Djudios polakos salyeran de Litvanya pasando por la Union Sovietika. Ma, en Julyo de 1940, kon la avansa de los almanes verso la Litvanya, los sovietikos ordenaron ke todos los postos diplomatikos etranjeros salgan de Kaunas. Sugihara demando i resivyo una ekstansyon. El uniko otro diplomat ke kedo en Kaunas fue Jan Zwartendijk, el konsul interimo de la Olanda.
Syertos refujyados Djudios se ambezaron ke dos izlas olandezas en los Karaibes, Curaçao i la Guyana Olandeza (oy konosida komo Surinam), no demandavan vizas de entrada formales. El konsul Zwartendijk fue otorizado a stampar pasaportes kon permisos de entrada. Ma, para yegar a los Karaibes se nesesitava pasar por la URSS. Komo kondisyon para obtener vizas de salida sovietikas, el konsul sovietiko estava demandando vizas de tranzito japonezas, porke se deviya de pasar por la Japonya para arivar a las izlas olandezas, kaji medyo mundo de leshor.
Ambezandosen de esta nesesidad, refujyados Djudios dezesperados se incheron delantre la puerta del Konsulado japoneza de Kaunas. La demanda de Chiune Sugihara al Ministeryo de Relasyones Eksteryores de Japonya para embiyar vizas de tranzito fue refuzado inkondisyonalamente. Sugihara tuvo ke tomar una desizyon muy difisil. Tuvo ke pezar entre su disiplinada obediyensa japoneza tradisyonal de una parte kon su vokasyon de Samuray para ayudar a los nesesitados de la otra parte. Sugihara i su famiya preferaron desfiar a su governo i ayudar a tantas personas komo sea umanamente posivle.
Durante los sigientes 29 dias, del 31 de Julyo asta al 28 de Agosto de 1940, los Sugihara pasaron todas sus oras sin durmir eskrivyendo vizas a mano, kon un averaje de 300 vizas al dia, lo ke es el ekivalante a un lavoro mensual del konsulado de Kaunas. El propyo Chiune refuzo deskansarse afilu unas kuantas oras i subzistyo kon sandviches, i Yukiko, la Sinyora Sugihara, masajeava las manos endoloradas de su marido todas las noches. Afilu durante sus ultimos momentos komo konsul japonezo en Kaunas, myentres suvyendo al treno yevandolo a Berlin el 1 de Septembre de 1940, Chiune eskriviya vizas i los entregava a los ke viya de la ventana del treno. Afilu kuando el treno empeso a alesharse, echo la stampa de viza de konsul a un refujyado para ke pueda eskrivir unos kuantos mas vizas de tranzito. Komo rezultado direkto del eroizmo de Sugihara, se salvaron las vidas de 6000 refujyados de la barbariya nazi, los ke pudyeron ansi suvir al treno transiberyano kon destino a Kobe, Japonya.
Despues de la Segunda Gerra Mundial, Sugihara fue arrondjado del puerpo diplomatiko japonez por su insubordinasyon. Para mantener su famiya lavoro komo tresladador i, finalmente, lavoro komo emprezaryo. No fue asta 1969 ke el inkreivle eroizmo i sakrifisyo de Sugihara fue deskuvyerto por un sovrebivyente ke aviya salvado. Chiune nunka avlo de sus aksyones. Chiune Sugihara muryo el 31 de Julyo de 1986, a la edad de 86 anos.
En el aniversaryo de su muerte vos kije akodrar su eroizmo.
