La izla Burgaz, es la tresera komo grandor de las Izlas de Prens de Estambol, ande ay sharas de pinos i munchas kazas elegantes de tavla antiguas.
Bivir en esta izla es un privilejyo, para las personas. Aki no ay la nosyon del tiempo.
El tiempo pasa aki sin depender de unas kozas.
Demanyana dar un torniko en el bodre de la mar entre los arvoles de pino, djugar en el kafe unas dos manos de kartas, i la noche bever un poko es un divertimyento. Dar un torno kon la barka, ir a peshkar, asender el ogar para asar las karnes, djugar kon top, entrar a la mar son las aktividades de la izla.
Burgaz es la izla la mas asolada i la mas natural entre las otras.
Burgaz es un sentimyento delisyozo, un amor, una pasyon espesyal para los ke se auzaron a bivir aya anyos largos.
El Dyo ke mos ayege de ir kada anyo a esta estimada izla, djusto komo un kazal chiko, ande se konosen todos i se saludan, avlan i burlan kon una kerensya ke no se topa en el dia de oy.
Kada anyo a la fin del mez de mayo, los aedados empesan a vinir, para pueder pasar un enverano alegre despues de un invyerno largo i yeno de problemas.
A poko a poko, todos se arekojen i se entyende ke ya empeso los tyempos kayentes, i la sezon de entrar a la mar.
En el empesijo del mez de junio el kal de Burgaz se avyo kon grande eskarinyo i alegriya. Ke ermozura de adjuntarse kon todas las karas konosidas!... kon unos kuantos mankos malorozamente. La Sinagoga de Burgaz tyene un lugar emportante i espesyal entre los yahides.
Aki, todos son komo una famiya. Los aedados keren serrar el klima a kavza ke se yelan, los mansevos kon los rabinos aryento la sudor debasho los talletes lo avren para pueder respirar, los chikos gritan, koryen, suven a la Teva i se van allado del Grande Rabino para pueder oyir lo ke esta avlando.
El Grande Rabino Rav Isak Haleva da una emportansa grande a los chikos i a las madres ke los engrandesen.
Mizmo ke azen muncho bruido, no desha avlar a dingunos, a kavza ke kontinuen a vinir i ke se auzen.
Despues de la orasyon de Shabat, la seuda i el adjuntamyento ke ay aya, las konversasyones tyenen una savor aparte.
Las vedruras, el ayre en el bodre de la mar, los arvoles, las flores, la natura repozan a la persona, i dan una trankilidad entre las bozes dulses de los pasharos ke se mesklan kon la boz del chufle de los vapores ke akostan kada una ora. Los peshkados en la mar mostran ke ay una vida aryento de la agua.
En todas las famiyas ay munchas reboltinas, kon los echos, ijos, la sanedad i munchas otras kozas. “En kada kaza una braza” diziya mi gramama (ke este en ganeden).
Ya es verdad, kozas ke no asemejan unos kon los otros. Para alesharmos de estos problemes de la semana i pasar un shabat i alhad en un kazal komo Burgaz es una shans grande para mozotros.
Alevantar temprano i ver el nasimyento del dia, la kolor kolorada del sol, kaminar una ora en el kamino entre los arvoles kon el ayre dulse, ir a la mar, nadar, ver a los amigos, aunarmos kon los keridos; es una shena ke se bive kada anyo al empesijo de esta sezon yena de aktivitades.
Bivir en Burgaz es un privilejyo!
