Emile Berliner (20 de Mayo de 1851 - 3 de Agosto de 1929) yego a los Estados Unidos para evitar ser yamado a la armada komo soldado en la gerra franko-prusyana. Nativo de Hannover, Almanya, Berliner empeso komo komersante i despues lavoro komo kontable antes de emigrar a la Amerika. En primero instalandose en Washington, D.C., i despues en la sivdad de Nueva York, entro a munchos diferentes postos i estudio las noches fizika en el Cooper Union Institute, i esto achakes de su pasyon por los endjenyos de elektrika.
En 1876, en Washington, D.C., Berliner fue testigo del lansamyento del telefon de Alexander Graham Bell. Fue fasinado i, lavorando solo en la unika kamareta de pansiyon ande morava, desvelopo un "transmisor de kontakto livyano" (loose contact transmitter) ke era un amejoramyento sinyifikativo en la teknolojiya orijinal de la transmisyon telefonika. Poko despues de prezentar una demanda de patent por el transmisor ke desvelopo, la American Bell Telephone Company lo empyego en su laboratoryo por investigasion i desvelopamyento. Se kedo en este posto durante syete anyos antes de fundar un sentro de investigasion independente a su nombre propyo en Washington, D.C.: Berliner Gramophone Company.
Una de las mijores inovasyones de Emile Berliner, i por la ke nunka no se le atribuyo el merito, fue el gramofon. Myentres ke Thomas Edison desvelopo el fonografo silendriko, Berliner transformo esta teknolojiya en desvelopando gravasyones de boz i muzikales sovre los diskos planos, lo que izo posivle de krear multiplas kopyas de la mizma gravasyon ke se podiyan reproduzir munchas vezes. Mas tadre vendyo los derechos de lisensya a Victor Talking Machine Company, ke fue merkado por RCA en 1929.
Aparte de estos endjenyos sovre el telefon i el gramofon, Berliner tambyen realizo importantes inovasyones para los tapetes de parke, izolasyon akustika i numerozos pedasos teknolojikos en la konstruksyon de helikopteres.
Aunke su vida estuvo yena de emosyonantes deskuvrimyentos, Berliner se intereso aktivamente en el movimyento sionisto. Eskrivyo munchos artikulos i letras a los editores sovre esta tema. Berliner fue konosido tambyen por su devuamyento a edukar el publiko sovre la importansiya de una buena ijyena, spesyalmente para los chikos.
Emile Berliner se kazo kon Kora Adler en el anyo 1881. Tuvyeron syete kriyaturas: Henry Berliner, Herbert Samuel Berliner; Hanna Edith Sanders; Edgar Maurice Berliner; Oliver Berliner; Louise Berliner, Alice Greenbaum.
Emile Berliner muryo el 3 Agosto de 1929 en Washington D.C.
