I rogi a el Kriyador en akel tyempo dizyendo, Sinyor del mundo, rogo, azeme pasar i vere la buena tyerra, akel monte bueno, i el Levanon. Se ensanyo el Kriyador i me disho, basta no me avles mas sovre este sujeto.
Ansi enpesa la perasha de Vaethanan. Moshe Rabenu tyene un dezeo de ver la tyerra prometida a nuestros avuelos. Por tanto el Kriyador ya le disho, ke el no va entrar a la tyerra santa. El pastor fiel, Moshe Rabenu, estuvo 40 anyos djuntos kon el puevlo judyo en el dizyerto. Ya arivaron a el momento ultimo ke ya estan prontos a entrar a la tyerra de Kenaan. Malgrado todo, Moshe Rabenu aze 515 orasyones, ke le aga una mersed, ke se apiade de el a lo manko de ver solo esta tyerra prometida. Porke Moshe Rabenu ya saviya muy bueno ke el Kriyador es grasyozo i piadozo. De este kavzo deprenden nuestros savyos i dizen en el Talmud: La orasyon es mas valutoza afilu de azer echas buenas. Ansi le responde el Kriyador, suve a la punta de Pisga i alsa tus ojos al oksidente, i al norte i al sud, i al oryente, i mira kon tus ojos, porke no pasaras este yarden. Moshe Rabenu, porke lo kumpla el Kriyador esta dezeo, izo munchos dialogos: aprovo de orasyonar, rogo ke el Kriyador le kumpla esta dezeo. Le disho a el Kriyador permeteme de ver la tyerra, penso entre si, si le avra permeter de verla puede ser se apiadariya i lo aziya entrar.
Ma alkavo entendyo Moshe Rabenu, mas no le aprovechera, ni orasyones ni rogativas la setensya ya fue dada. Ma por tanto devemos ke saver, de una kontentarmos kon una sola orasyon si no ke devemos de pujar las orasyones. Por kavza ke el Kriyador dezea las orasyones de los djustos. I tambien ke la orasyon es mas valutoza, mas grande de los echos buenos ke se azen sin orasyonar.
