Silva Filiba
Kuando los Judios biviyan en sus tierras, no aviya diya mas alegre ke el 15 del mez de Av, diya ke se fiestava kon ermandad i amor, sin diferensya de klasa, de kasta ni de rikeza. Era en mizmo tiempo la epoka ande se arekojiya el fruto de la vinya kon bayles i kantes. Las ijikas ke se arekojiyan para baylar no se vistiyan de seda, de sirma ni de kolor, sino ke de fostanes blankos emprestados de las unas a las otras para no averguensar i arebashar las ke no teniyan poder.
La demanyana de Tu ve Av se iva la ija del Rey ande la ija del Kohen-Agadol i le demandava ansi: “Amiga, me puedes emprestar tu fostan blanko para ke vayga a baylar en las vinyas i en los kampos”. I la ija del Kohen-Agadol respondiya: “Tu dezeyo es mi dezeyo i todo lo miyo es tuyo, toma mi fostan i vate a partisipar a los bayles”. I la ija del Kohen-Agadol se iva ande el asistente del Kohen-Agadol i le aziya la mizma demanda, i resiviya la mizma grasioza repuesta ke le diziya: “Toma mi uniko fostan blanko, i ke seya el korason del mansevo ke vas a topar, blanko komo este fostan”. I esta ijika tanbien se iva ande una otra ija de padre onoravle i ansi ke la ija de los rikos asta los proves de Yerushalayim. Se puediya ver ijas de proves indosen a la ija del Rey ke respondiya kon amistad en dizyendo: “Todas nasemos dezmudas, lo miyo es tuyo ermana, toma i vate en pas, ke la alma del ke sera tu kerido seya mas blanka del fostan ke de empresti”. I ansi el diya de Tu be Av saliyan a las guertas i vinyas todas las ijas de Yerushalayim kon sus panyos emprestados i se puediya ver la ija del Rey vistida de lo ke se empresto de la mas prove de Yerushalayim. Los mansevos viniyan de todas las partes, eskojiyan una ijika ke les plaziya sin saver nunka si era rika o prove. Mano en mano en este diya de fiesta los bayles kontinuavan diya entero. Los ke estavan viendo de las alturas de la montanya de leshos este ermozo tablo ke paresiyan buketos de flores blankas ke aviya kresido en el kampo.
“Mansevo! No mires a la rikeza ni a la ermozura, todo es vanedad. La ermozura pasa i la rikeza se bola, mira a la alma de tu kompanyera, es lo mas emportante”.
Espozoryos, bodas, amor i alegriya nasiyan en este diya de Tu Be Av ke se izo diya de fiesta de los amorozos. Esta fiesta tiene su orijin en el tiempo de los “Juzgos” entre los anyos 1200 a 1020 AJ. Era una epoka ande dainda no teniyamos reynado i los Trivios de Israel biviyan kada uno independiente komo un sistem de feodalita. Estorya larga i areskura ke se puede meldar en la dalkavo partida del livro de los Juzgos. Tu Be Av bueno para todos, pas i alegriya en los korasones.
