Vyernes pasado fyestimos tu b’Av. En meldando un artikulo sovre Tu b’Av me ambezi ke esta fyesta teniya un otro buto diferente de lo ke saviyamos. Kije partajarlo.
Tu b'Av, el kinze de Av, era selebrado en la antiguidad por muchachas, mansevas, no kazadas, bekyaras ke saliyan este dia i se ivan en baylando a las vinyas kon la esperansa de ser eskojidas por un mansevo bekyar para ser su novya. Por modo de esto, esta fyesta fue konosida komo el Saint Valentin, dia de amor Djudia. Ma de otra parte, este dia tambyen estuvo markado para la selebrasyon por otras razones diferentes.
El kinzen dia de Av tambyen markava el dia de alkavo del anyo kalendaryo lunar en el ke se podiya kortar arvoles para obtener lenyos para los sakrifisyos del Templo de Yerushalayim. Despues del kinzen dia, el poder del sol, ke ampesava poko a poko a amenguarse, ya no se konsiderava bastante fuerte para sekar el arvole de ande se obteniya lenya (Talmud de Yerushalayim, Taanit 4:7) Porke el 15 de Av? Rabi Jacob bar Aḥa en el nombre de Rabi Yasa: Porke este es el buen momento para kortar lenya, porke en kualker lenya kortada en este dia no biven guzanos; i komo es dicho, “kualker lenya ke kontyene un guzano es diskualifikado de entrar i kemar en el altar santo).
Durante la rekonstruksyon del Templo, se introduizo una seremoniya de oferta de lenyas. Kuando Ezra i Nechemiah trusheron al puevlo a Yerushalayim, vyeron ke aparte ke el Templo se aviya destruido, la tyerra misma aviya sido devastada. En el proseso de la destruksyon, kaji todos los arvoles fueron arrankados asta la raiz, kriyando una grande penuriya de arvoles. Kualker ke podiya azer una donasyon de arvole o lenya lo aziya, i la “oferta de lenyas” se izo una tradisyon i afilu un grande onor.
Esta oferta de lenyas es asosyada kon una istorya del eroizmo uniko del puevlo Djudio en su dezeo de servir al Dio a traves del Templo. Una vez, durante los tyempos del Segundo Templo, el poder okupante de la epoka defendiyo al puevlo, a los Djudios de trayer lenyas al Templo. En lugar de dezesperarse, los Djudios izyeron eskaleras de lenya i, kuando se les demando en los puntos de kontrol ande se ivan i para ke nesesitavan las eskaleras, los Djudios respondyeron ke estavan tomando las eskaleras para rekuperar a las muevas palombas ke nasyeron de los nidos. Despues de pasar las barrikadas, las eskaleras fueron demontadas i las lenyas yevadas al Templo. (Esta istorya se topa en el Talmud de Babilonya, Taanit 28a).
I kon esta okazyon me ambezi otruna koza mueva.
