Kualo es tomar vengansa?
Kuando demandas a alguno: “Emprestame tu chadir” i te dize no. Al otro diya viene ande ti i demanda: “Emprestame tu bluza”. Tu le respondes: “No te esto emprestando, komo tu no me emprestates a mi”. Esto es un egzemplo de vengansa.
El Talmud, Yoma 23a
Esto esta en la natura umana. Kuando alguno mos aze danyo, keremos pagarle de la mizma manera. Estamos furiozos, no mos olvidamos de esto i kuando mos viene la oportunidad respondemos de la mizma manera.
Vengarse esta defendido en el Judaizmo.
Maimonides eskrive sovre la vengansa en su kodigo de ley judiya:
Vengarse es una abitud muy malo. Una persona deve estar abituada a elevarse ensima sus sentimientos de la vida de kada diya, porke el ke entiende el buto del mundo, konsidera todas las kozas komo ke si fuera todo vaziyura ke no vale la pena de bushkar a vengarse.
A la kontra dize Maimonides si alguno ke te izo danyo, viene i te demanda un favor, deves de responder: "Kon todo el korason”. Komo dize el rey David en los Salmos: Ah ya pagi a los ke me izieron malisya? Es ke salvi a los ke me detestavan.
Mas i mas la ley judiya mos defende de guadrar renkor.
El Rabino Schneur Zalman de Liadi dize en su kodigo de la ley Judiya, ke “el ombre kale ke efase todo modo de sentimiento de vengansa ke se topa en su korason i nunka mas ke se akodre de esto”.
No tomar vengansa no se trata solamente ke alguno troke sus aksyones, es tanbien ke ni el pensamiento de vengansa no kale ke entre en su korason.
El Talmudisto del 13. siglo, Haham Aaron Halevi de Barselona mos eksplika:
La persona kale ke sepa ke todo lo ke mos afita, bueno o malo, es por ke es la voluntad del Dio. Es ke el Dio kere ke esto afite i por esto no kale tomar vengansa de la otra persona, porke la otra persona no es la razon de lo ke mos paso.
El Rav Schneur Zalman de Liadi eksplika en su Tanya ke si la persona ke fue danyada perdona, la persona ke izo danyo es siempre responsavle.
El verso ke defende la vengansa termina kon la famoza dicha: “Deves de amar tu proksimo komo a ti mizmo”.
El Rabino Moshe Ben Nahman, “Nahmanides” eksplika ke efasar el evenimiento de vuestro korason garantizara ke en permetiendo ke ames a tu proksimo, nunka vas a vinir kontra este komandamiento, sin emportansa lo ke paso entre vozotros dos.
