Esta fraza sintimos por la lingua Ladino, ke se meskla kon la lingua Turka muy muncho. El Ladino es mesklado kon el Turko. Ama agora el sujeto muestro no es esto. Vos kero kontar un poko por el vapor “Paşabahçe” (Pashabahche). El vapor Pashabahche se konstruyo en 1952, en Italia, en la sivdad Taranto. Komo todo los vapores kon el akompanyamento de shampanyas abasho a la mar. En 2.5 diyas vino al porto d’Estanbol. Transporto miles de djentes. I agora a la edad de 70, en el 13 de Agosto en un proyekto de la Munisipalidad (en 150 diyas 150 proyektos) de muevo abasho a la mar del Bosfor.
En los diyas pasados este haber kayo a los kanales de enformasyones sovre el vapor de Pashabahche ke lavorava durante 1952-2010 entre las izlas de Kinali, Burgaz, Heybeli i Buyukada i tambien Yalova. Eran tres vapores ke se yamavan kon los nombres de los distriktos todo kon “bahche”. Dolmabahche, Fenerbahche i Pashabahche. Estos tres vapores eran kaji mizmos modeles. Malorozamente el vapor Dolmabahche en 1994 no se salvo de devenir eskarta para azerse jiletes de arapar. El vapor Fenerbahche tomo lugar en el muzeo de Koch. I agora el vapor Pashabahche teniya el mizmo mazal de azerse hurda.
El jurnalisto, Adil Bali ke es nasido de Buyukada, kon sus esforsos i posibilidades de su entorno, izo ampesar una kampanya de sinyaturas en Change.org/PasabahceVapuru i parvino. De 2017 fin ke parvino, el arekojo kaji 7.000 sinyaturas, estava avlando i eskrivyendo a las personas otorizadas sovre este vapor ke no es un eskarta, es una istorya d’Estanbol. A la fin la Munisipalidad d’Estanbol tomo esta responsabilidad de renovar el vapor Pashabahche. I se izo todo muy bueno i ermozo. De tura ke seya. No se, si se va pueder utilizar solo para los transportos; puedeser se va utilizar para konsertos, para konferensiyas. Ma lo ke sintimos i meldimos en las enformasyones es ke los salones del vapor se renovaron komo se deve komo el orijinal i metieron muevas makinas. Komo a mi, a munchos Estanbollis les vino un regalo maraviyozo porke de ver ke se esta trokando todo modo de koza en Estanbol desde 50 anyos, las kalejas, las kazas, el modo de la vida, una koza ke se protejo es presyozo para los sivdadinos. Es la istorya de la sivdad. Son memoryas de los sivdadinos. Es apatronarte de tus rekuerdos. Munchos Estanbollis ke vyenen de otros paizes agora ke no estan sivdadinos de esta ermoza sivdad tyenen la savor i el dezeo de pasear en el Bosfor kon estos vapores blankos, ermozos i bever un chay kon el simit en el bodre de la mar. Dingun vapor rapido no va pueder remplasar a estos barkos elegantes.
