Esta semana meldimos en los jurnales ke los ladrones se rovaron dos Sefer Toras del kal de Gaziantep ma los apanyaron el mizmo diya. Ma komo no biven djudios en Gaziantep, no deshan Sefer Toras kasheres kuando no ay dingunos en esta sivdad. Se estava viendo mismo de las fotos ke la Sefer Tora no era orijinal; era printada en papel. Era la Aftara. I la segunda kasha - en el oriente de muesto payis las mapas no son las mismas ke en el oksidente ande se emplea kashas para guadrar las sefer toras- no avia nada porke no estan deshando la Sefer Tora aya kuando tornan a Estanbol. Dospues mos disheron ke el prezidente de la munisipalitad kere azer una biblioteka en la sinagoga. Kreo ke no topo otro lugar!! Deke no pensan de azer un chiko muzeo sovre los Djudios de Gaziantep, eksplikando sus istorias i metyendo fotografias sovre los Djudios ke bivyeron en esta sivdad?
Ay dos semanas ke el Mayor de Edirne me telefono para demandarme syertas kestyones konsernando los djudios de Milas. Ya se ke bivia una komunidad bastante ancha en Milas. El padre, las tiyas i los grandes paryentes de mi amigo, Jak Levi eran orijinarios de esta sivdad. Konversavamos kon su nona. I mos kontava munchas kozas sovre los Djudios de Milas. El mayor kere ke el simiteryo Djudio sea reorganizado i mismo keren restorar la Sinagoga. Ma kreo ke esta sana.
De una parte puedesh ver dirijentes ke keren restorar todas las rikezas de los djudios, i de la otra parte dirijentes ke no keren.
Esta semana me embiyeron fotos de syertas tombas bastantes antiguas ke fueron guadradas kuando izieron fraguas en el simiteryo de Edirne. Dingunos no me eksplikaron esto. Es yo ke esto pensando de esta manera. Si reushimos a salvar estas piedras kreo ke devemos de enstalarlas en la parte del simiteryo ande no se topa tombas.
En el Impero Otomano i en los primeros anyos de la republika avia munchas sivdades ande bivian djudios. Ma oy en diya los vemos en Estanbol i en İzmir. Ya savemos ke ay syertas chikas komunidades en Bursa, Ankara, Antakya, Adana, Edirne, Çanakkale i Kırklareli (unas kuantas personas en las 3 sivdades dalkavo). No vos esto mensionando las sivdades o kazales ande estan biviendo los Djudios los 10 o 15 anyos dalkavo komo Bodrum, Çeşme i otros kazales d’enverano.
Oy en diya reelmente es muy difisil para los dirijentes de muestra komunidad de pueder kontrolar todo este patrimonio. El Dyo ke mos de fuersa i koraje para pueder konservarlo.
Esto es una mapa ke se emplea en el oriente de muestro payis
