Syempre kije ambezarme el orijen de este uzo. Me dyeron diferentes eksplikasyones. Topi un artikolo sovre este sujeto i kije partajarlo.
La tradisyon Djudia de meter pyedras enriva de una tomba vyene de la antikidad i sus orijenes no son muy klaros. Es un uzo o una tradisyon i no un komandamyento de ley. I kon el tyempo se dyeron munchas eksplikasyones por este uzo.
Aki vos va dar syertas eksplikasyones.
Avertisimyento a los Kohanim
Durante los tyempos del Templo en Yeushalayim, los Kohanim se aziyan ritualmente impuros si se aserkavan a lo manko asta kuatro pyezes de un muerto. Komo rezultado, los Djudios empesaron a markar las tombas kon montones de pyedras para endikar a los Kohanim ke estavan serka de un muerto i ke no deviyan de aserkarsen.
Para mantener la alma, la neshama en este mundo, El Talmud dize ke despues ke una persona muere, su alma kontinua a bivir, a morar por un syerto tyempo en la tomba ande fue enterrada. Meter pyedras en una tomba mantyene la alma en este mundo, lo ke por personas serkanas es rekonfortante. Otra interpretasyon relasyonada dize ke las pyedras evitan los diavlos i golems de entrar en las tombas.
Las pyedras turan mas ke las flores. Las flores, aunke ermozas, eventualmente muriran. Una pyedra no murira i puede simbolizar la permanensya de la memorya i la erensya.
Un djugo de palavras en Ivrit.
El Rav Simkha Weintraub, direktor rabíniko del New York Jewish Healing Center, esta dando otra interpretasyon tradisyonal: "La palavra en Ivrit para 'pyedrizikas' es “tz'ror”, i de otra parte esta palavra en Ivrit tambyen sinyifika 'atadura'. Kuando meldamos en la azkara la orasyon de El Maleh Rahamim (i en otros tyempos) dizimos ke el defunto sea 'atado kon la kordela de la vida' – tz'ror haHayyim. En metyendo la pyedra, amostramos ke estuvimos en la tomba i ke la memorya del defunto kontinua a bivir en i kon mozotros”.
Muncha djente bushkan pyedras spesyales para meter enriva de la tomba de este kerido o kerida. Puede ser una pyedra de un lugar ke era sinyifikativo para el defunto, una pyedra ke semboliza un evento spesyal para el defunto, o simplemente una pyedra interesante o atraktiva. Savyendo ke no ay dingun komandamyento relijyozo ke devemos akumplir, meter una pyedra sovre una tomba es una oportunidad para kriar su propyo ritual o de azer las kozas de la manera ke seya mas sinyifikativo por la memorya.
Adaptado de My Jewish Learning
