Lo ke admiro lo mas en tu arte, dize Albert Einstein a Charli Chaplin (Ke para mozotros es Sharlo) es la Universalidad. No avlas dinguna palavra i todos te entyenden.
Es verdad, responde Charlie Chaplin, ma tu fama es muncho mas grande. El mundo entero te admira i dinguno te entyende!
***
El ombre bien riko tiene dar i aver kon una italyana. Una noche ke se enkontraron, la italyana le dize ke esta prenyada. Para no derrokar su reputasyon i su vida familyal, le promete de darle una grande suma de paras, si aksepta de irse a Italya, de tener el bebe aya i kon la kondisyon ke el se va kargar del rezin nasido asta los 18 anyos. La italyana aksepta i le demanda komo el va tener haber del nasimyento del bebe. El le responde ke “al nasimyento me embiyas una karta ande eskrives solo “spageti”.
Pasaron los mezes i un diya entrando a kaza, enkontra su mujer un poko mareyada ke le dize: “Te vino oy de la posta una karta un poko tuaf (kuryoza). El ombre melda la karta, se aze entero blanko i se dezmaya. La mujer melda la karta: “spageti, spageti, spageti. Dos kon yullikas (kyofte redonda) uno sin”.
***
El anyo es 2032 i Sara Goldstein fue elijida la primera Mujer i ensima de todo, la primera persona Djudiya komo Prezidente de Los Estados Unidos. Después de siertas semanas, yama a su madre dizyendo: “Mama, espero ke vas a vinir al diya de la inogurasyon”. La madre le responde: “No kreyo Presyada, son 10 oras de kondusir, i tu padre ya no es tan mansevo komo era, i yo sufriyendo kon mis pyernas…"
“No te merekiyes, mama, te va embiyar el avión prezidensyal de Los Estados Unidos para la ida i vinida a kaza, i una limuzin va esperar delantre la puerta.”
“No se, todos van a estar muy shik i yo no se ke vistirme.”
“Esto sigura ke tendriyas fostan echa por el mijor modelisto de aya”.
“Saves ke no puedo komer las kozas tan rikas ke se topan en estos pransos”.
“Mama es el mijor servisyo de tratamiento de aki ke va organizar el pranso i todo va ser syen por syen Kasher. Kero ke vengas i tu”.
Así la madre aksepto de estar ayi, el 20 de Janviye kuando Sara Goldstein va djurar komo Prezidente de Los Estados Unidos. Sentada en el primer rango, la madre se aserka del Senator ke esta a su lado i le dize: “Estas vyendo esta mujer ke tiene la mano ensima la Tora i ke se va ser Prezidente de Los Estados Unidos?”
“Si” dize el Senator, “la esto vyendo”.
“Su ermano es Doktor”!!!
(Para la madre Djudiya, el ijo presyado tiene otra valor)
